मुंबई-महाराष्ट्राचे सामाजिक न्याय मंत्री संजय शिरसाट यांचा एक व्हिडिओ चांगलाच व्हायरल होत आहे. व्हिडिओमध्ये संजय शिरसाट आपल्या बेडरूममध्ये बसलेले सिगारेट पीत आहेत आणि समोर एक बॅग दिसत आहे. या बॅगमध्ये पैसे असल्याचा दावा केला जात आहे. तसेच बाजूला आणखी एक बॅग उभी असल्याचे दिसत आहे.
(हा व्हायरल व्हिडीओ आहे ,खरा खोटा याबाबत आमचा कोणताही दावा नाही mymarathi.net)
शिवसेना ठाकरे गटाचे खासदार संजय राऊत यांनी पत्रकारांशी बोलताना शिवसेना शिंदे गटाचे नेते व मंत्री संजय शिरसाट यांच्यावर गंभीर आरोप केले आहेत. संजय शिरसाट यांचा एक व्हिडिओ व्हायरल झाला आहे, त्यात एका बॅगमध्ये पैसे असल्याचा दावा संजय राऊत यांनी केला आहे. यावर संजय शिरसाट यांनी स्पष्टीकरण दिले असून राऊत यांनी केलेले आरोप फेटाळून लावले आहेत.
विधानभवनाच्या परिसरात पत्रकारांशी बोलताना संजय शिरसाट यांनी संजय राऊत यांच्यावर टीका केली आहे. ते म्हणाले, संजय राऊत यांनी आजही ठरल्याप्रमाणे भुंकण्याचे काम केले आहे. एकनाथ शिंदे दिल्लीला गेले होते, मग ते अमित शहा यांना भेटले आणि शिवसेना भाजपमध्ये विलीन करतो म्हणाले, असे मूर्खासारखे स्टेटमेंट संजय राऊतच करू शकतात. आम्ही जे काही त्यांना टोचले आहे, त्याची जखम आजही त्यांची भळभळते.
पुढे बोलताना संजय शिरसाट म्हणाले, एकंदरीत टार्गेट एकनाथ शिंदे असतात. एकनाथ शिंदे यांनी 3 वर्षापूर्वी जी काही भूमिका मांडली होती त्यामुळे त्यांची गेलेली सत्ता त्यांना स्वस्थ बसू देत नाही. आम्हाला सत्तेतून या माणसाने खेचले. माझी खुर्ची घेतली, मग 50 खोके, या सगळ्या वल्गना करून झाल्यावर नवीन स्टोरी बनवतात. संजय राऊत यांना हातपाय बांधून हॉस्पिटलमध्ये न्यावे की के अशी परिस्थिती निर्माण झाली आहे.
व्हिडिओ काय दाखवतो आहे की माझे घर आहे, माझी बेडरूम आहे, माझा लाडका कुत्रा आहे आणि एक बॅग तिथे ठेवली आहे. याचा अर्थ मी प्रवास करून आलो आहे आणि मी बेडवर बसलो आहे. अरे मूर्खांनो, पैसे असते तर अलमारीमध्ये ठोसले असते. परंतु, यांना कपड्याची बॅग सुद्धा पैशांची बॅग वाटते. यांना पैशांशिवाय काहीच दिसत नाही. एकदा एकनाथ शिंदे साहेब त्यांच्या विमानातून खाली उतरून जात होते आणि त्यांचे बॉडीगार्ड ज्या काही बॅगा घेऊन चालले होते, त्यात पण यांना पैसे असल्याचे वाटले होते.
पुढे बोलताना संजय शिरसाट म्हणाले, आमच्याकडे मातोश्री 1, मातोश्री 2 नाही. माझे मतदारसंघातील प्रत्येक माणसाला विचारा, सगळ्यांना स्वागत असते. कार्यकर्ते असतात, एखाद्याने उत्साहाच्या भरात व्हिडिओ काढला असेल. माझ्याकडे कोणालाही चिठ्ठी देऊन बोलावले जात नाही. कार्यकर्त्यांसाठी आम्ही आहोत. आम्हाला शिवसेना प्रमुखांनी आम्हाला शिकवले आहे, तुम्ही कार्यकर्ता म्हणून रहा.
