मुंबई- राज्याचे उपमुख्यमंत्री एकनाथ शिंदे यांनी पुण्यातील एका कार्यक्रमात ‘जय गुजरात’ असे म्हटले. त्यावरून आता विरोधकांनी जोरदार टीका करण्यास सुरुवात केली आहे. शिवसेना ठाकरे गटाचे खासदार संजय राऊत यांनी ‘शहा सेना’ असे म्हणत शिंदेंवर निशाणा साधला आहे.डुप्लीकेट शिवसेनेचे खरे रूप आले समोर, ‘महाराष्ट्राचं खायचं, महाराष्ट्रात राहायचं अन जय गुजरात म्हणायचं, चालणार नाही असेही ते म्हणाले आहेत
खासदार संजय राऊत यांनी ट्विट करत म्हटले, अमित शहा यांच्या डुप्लिकेट शिवसेनेचे खरे रूप आज बाहेर आले. पुण्यात या महाशयांनी अमित शहा समोर ‘जय गुजरात’ची गर्जना केली! काय करायचे? ऐशा नरा मोजूनी माराव्या पैजारा हजार माराव्या आणि एक मोजाव्या. हा माणूस महाराष्ट्राच्या मंत्रिमंडळात कसा राहू शकतो? असा सवाल देखील संजय राऊत यांनी विचारला आहे.
केंद्रीय गृहमंत्री अमित शहा हे सध्या महाराष्ट्राच्या दौऱ्यावर आहेत. त्यांच्या उपस्थितीत पुण्यात विविध कार्यक्रमांचे आयोजन करण्यात आले आहे. अशाच एका कार्यक्रमात एकनाथ शिंदे यांनी देखील सहभाग घेतला. या दरम्यान उपमुख्यमंत्री एकनाथ शिंदे यांनी ‘जय गुजरात’ अशी घोषणा करत सर्वांचे लक्ष वेधून घेतले. भाषणादरम्यान एकनाथ शिंदे यांनी जय हिंद, जय महाराष्ट्र आणि जय गुजरात असा नारा दिला. त्यामुळे आता अनेकांच्या भुवया उंचावल्या आहेत.
दरम्यान, महाराष्ट्रात आधीच भाषेचा वाद सुरू असताना एकनाथ शिंदे यांनी केलेल्या जय गुजरातच्या घोषणेमुळे आणखी वाद पेटण्याची शक्यता आहे. उद्धव ठाकरे यांनी यापूर्वीच महाराष्ट्रातील मोठे प्रकल्प गुजरातला पळवण्यात येत असल्याचा आरोप केला आहे. सत्ताधारी पक्षातील नेत्यांकडून आता एकनाथ शिंदे यांनी केलेल्या घोषणेची सारवासारव केली जात असल्याचे दिसत आहे.
