‘चला हवा येऊ द्या’ ची बदलणार आता हवा …

‘चला हवा येऊ द्या’ या कार्यक्रमाच्या नव्या पर्वाची बरीच चर्चा आहे. कार्यक्रमातला तोच तोच पणा रसिकांना जेव्हा नकोसा वाटू लागला तेव्हा आता या कार्यक्रमाचं पर्व बदलण्यात येते आहे. त्याचं बदलणारं स्वरूप, त्यातले कलाकार, नवोदितांची एंट्री या साऱ्यामुळे कार्यक्रम नेमका कसा असणार, याबाबत चाहत्यांना उत्सुकता आहे. सगळ्यात महत्त्वाचं म्हणजे, निलेश साबळे कार्यक्रमात नसणार, असं बोललं जात असल्यामुळे सूत्रसंचालकाच्या खुर्चीत कोण बसणार हा प्रश्न प्रेक्षकांना पडला होता. आता याचं उत्तरही समोर आलं आहे. अभिनेता अभिजीत खांडकेकर ‘चला हवा येऊ द्या’ या कार्यक्रमाचं सूत्रसंचालन करणार आहे.आजवर अभिजीतनं कथाबाह्य कार्यक्रम, पुरस्कार सोहळे, सांस्कृतिक कार्यक्रमांचं सूत्रसंचालन केलं आहे. त्याच्या निवेदनाचा वेगळा चाहतावर्ग आहेच. आता तो एका गाजलेल्या कार्यक्रमाच्या दुसऱ्या सीझनचा सूत्रधार म्हणून जवाबदारी उचलणार आहे. विनोदी कार्यक्रमार्ग सूत्रसंचालन करताना बघणं औत्सुक्याचं ठरणार आहे. कार्यक्रमाच्या आधीच्या पर्वात निलेश साबळे दिग्दर्शनही करायचा. पण आता त्याच्या जागी प्रियदर्शन जाधव, अमोल पाटील आणि योगेश शिरसाट हे तिघं जण दिग्दर्शनाची धुरा सांभाळणार आहेत.लेखकांच्या टीममध्ये प्रियदर्शन जाधव, योगेश शिरसाट यांच्यासह अभिषेक गावकर, रोहित कोतेकर, पुर्णानंद वांडेकर, अनिश गोरेगांवकर हेसुद्धा असणार आहेत. श्रेया बुगडे, कुशल बद्रिके, भरत गणेशपुरे यांच्यामध्ये महाराष्ट्राची हास्यजत्रा फेम गौरव मोरे या नव्या नावाची भर पडली आहे. निलेश आणि भाऊ कदम नवीन सीझनच्या टिझरमध्ये दिसले नसल्यामुळे त्याविषयीही बरीच चर्चा होती. पण आता या पर्वात आणखीही काही लोकप्रिय कलाकार दिसणार असल्याचं समजतंय.