पुणे-पूर्ववैमनस्यातून दोन तरुणांवर टोळक्याने धारदार कोयत्याने वार केल्याची घटना पुणे-सातारा रस्त्यावर चव्हाणनगर कमानीजवळ घडली. टोळक्याने केलेल्या हल्ल्यात एक युवक गंभीर जखमी झाला असून त्याला रुग्णालयात उपचारसाठी दाखल करण्यात आले आहे. याप्रकरणी संबंधित टोळक्याविरुद्ध खुनाचा प्रयत्न केल्याप्रकरणी गुन्हा दाखल करण्यात आला आहे.
वैभव नाईकनवरे (वय 17, रा. शंकरमहाराज वसाहत, धनकवडी), कार्तिक गायकवाड (वय 16, रा. संभाजीनगर, धनकवडी) अशी जखमी झालेल्यां व्यक्तींची नावे आहेत. याबाबत शीतल सचिन नाईकनवरे (वय 40) यांनी सहकारनगर पोलीस ठाण्यात आरोपी विरोधात फिर्याद दिली आहे. त्यांनी दिलेल्या तक्रारीनुसार,आरोपी टोळक्याविरुद्ध गुन्हा दाखल करण्यात आला आहे.
पोलिसांनी दिलेल्या माहितीनुसार, नाईकनवरेचा शंकरमहाराज वसाहत परिसरातील काहीजणांशी वाद झाला होता. नाईकनवरे आणि गायकवाड हे 16 जून रोजी रात्री पावणेअकराच्या सुमारास कामावरुन घरी जात होते. पुणे-सातारा रस्त्यावरील चव्हाणनगर कमानीजवळ टोळक्याने त्यांना जबरदस्तीने अडविले. नाईकनवरे आणि त्याचा मित्र गायकवाड यांच्यावर टोळक्याने जुन्या वादातून थेट त्यांच्यावर कोयत्याने वार केले.
टोळक्याने नाईकनवरे याच्या डोक्यात जोरात काेयता मारल्याने तो गंभीर जखमी झाला. या घटनेमुळे सदर परिसरात नागरिकांमध्ये दहशत देखील निर्माण झाली. या घटनेची माहिती मिळताच पोलिसांनी घटनास्थळी धाव घेतली. दोघांना तातडीने खासगी रुग्णालयात दाखल करण्यात आले. पसार झालेल्या आरोपींचा शोध घेण्यात येत असून, गुन्हे शाखेच्या पोलिस निरीक्षक सुरेखा चव्हाण पुढील तपास करत आहेत.
