भटके विमुक्त आदिवासी संयुक्त समितीच्या 65 अतिथिंची विधान भवनास सदिच्छा भेट
मुंबई दि. 17 जून, 2025 :- विधानभवन, मुंबई येथे भटक्या विमुक्त आदिवासी संयोजन समितीच्या 65 सदस्यीय शिष्टमंडळाने आज उपसभापती डॉ.नीलम गोऱ्हे यांची भेट घेऊन विधीमंडळ कामकाजाची सविस्तर माहिती घेतली.
कार्यक्रमाचे प्रस्ताविक श्रीमती मुमताज शेख यांनी केले. त्यांचे संस्थेतर्फे घेण्यात आलेल्या प्रशिक्षण सत्रातील सहभागी प्रतिनिधींचा सत्कार डॉ.नीलम गोऱ्हे, उपसभापती, महाराष्ट्र विधानपरिषद यांचे हस्ते यावेळी करण्यात आला.याप्रसंगी बोलताना डॉ.नीलम गोऱ्हे यांनी सन 1992-1993 पासून भटक्या विमुक्तांसाठी केलेल्या कार्याच्या आठवणींना उजाळा दिला. भटक्या विमुक्तांनी संविधानातून मिळालेले सर्व हक्क, मुलभूत सुविधा, आरक्षण, शिष्यवृत्ती व शासनाच्या लाडकी बहिणसारख्या योजनांचा लाभ घेऊन स्वत:चे, कुटुंबाचे व समाजाचे सक्षमीकरण करण्याचे आवाहन केले.
कार्यक्रमाचे सुत्र संचालन श्री.निलेश मदाने, जनसंपर्क अधिकारी, महाराष्ट्र विधानमंडळ सचिवालय यांनी केले. कार्यक्रमास मुमताज शेख, श्रीमती ललीता धनवरे, ॲड.अरुन जाधव, शरद बराथे, उमा जाधव, विनोद पवार, भावना वाघमारे, स्वाती खंडागळे, पपिता माळवे, प्रिर्यदर्शनी जाधव, हजरत अली सोनीकर, रजनी पवार, बाबुसिंग पवार, अप्पाराव राठोड आदींची उपस्थिती लाभली.
