नवी मुंबईतील एका कंपनीमध्ये गुरुवारी सकाळी गॅस गळतीची घटना घडली आहे. कार्बन मोनॉक्साईडच्या गळतीमुळे कंपनीतील तब्बल 25 महिला कामगार बेशुद्ध झाल्या असून, एकूण 27 जणांवर या विषारी वायूचा परिणाम झाला आहे. सर्व बाधितांना तात्काळ उपचारासाठी वाशी येथील एमजीएम रुग्णालयात दाखल करण्यात आले असून, काहींची प्रकृती चिंताजनक असल्याची माहिती समोर आली आहे.
ही घटना तुर्भे एमआयडीसी परिसरातील डॉ. बाबासाहेब आंबेडकर नगरजवळील डी-326 क्रमांकाच्या औद्योगिक युनिटमध्ये घडली. सकाळच्या सुमारास काम सुरु असतानाच महिला कामगारांना श्वास घेण्यास त्रास होऊ लागला. तर काहींना डोकेदुखी आणि चक्कर येण्याची लक्षणे जाणवू लागली. पाहता पाहता अनेक महिला बेशुद्ध अवस्थेत खाली कोसळल्या. घटनेची माहिती मिळताच कंपनीतील इतर कर्मचाऱ्यांनी तत्काळ मदतकार्य सुरु करत सर्वांना बाहेर काढले.
कंपनीतील 27 कामगारांना तातडीने एमजीएम रुग्णालयात दाखल करण्यात आले आहे. त्यामध्ये बहुसंख्य महिला कामगार असून काहींची प्रकृती चिंताजनक असल्याचे डॉक्टरांनी सांगितले. रुग्णालय प्रशासनाने सर्व रुग्णांवर आवश्यक ती वैद्यकीय मदत दिली असून, पुढील उपचार सुरु आहेत.
प्राथमिक तपासणीतून समोर आलेल्या माहितीनुसार, कंपनीतील रासायनिक प्रक्रियेमधून कार्बन मोनॉक्साईड (CO) वायूची गळती झाल्याचा संशय व्यक्त करण्यात येत आहे. कार्बन मोनॉक्साईड हा रंगहीन, वासहीन व अत्यंत विषारी वायू असून, याचा थोडाही संपर्क शरीरावर गंभीर परिणाम करू शकतो.
दरम्यान, गेल्या काही महिन्यांपासून औद्योगिक क्षेत्रांमध्ये अशा प्रकारच्या दुर्घटना वाढत असल्याने कामगारांच्या सुरक्षेचा प्रश्न ऐरणीवर आला आहे. या घटनेमुळे पुन्हा एकदा औद्योगिक सुरक्षा यंत्रणांवर प्रश्नचिन्ह निर्माण झाले आहे, आणि अशा घटना टाळण्यासाठी उपाययोजना करण्याची गरज आहे.
