पुणे- महानगरपालिका महापालिका आयुक्त पदाचा पदभार नवल किशोर राम (भा.प्र.से) यांनी डॉ. राजेंद्र भोसले (भा.प्र. से) यांचे कडून आज दि. ३१/०५/२०२५ रोजी स्वीकारला. डॉ. राजेंद्र भोसले यांनी पुष्पगुच्छ देऊन त्यांचे स्वागत केले.
पुणे महानगरपालिका महापालिका आयुक्त पदाचा पदभार नवल किशोर राम (भा.प्र.से) यांनी स्वीकारल्या नंतर, त्यांनी सांगितले कि, पुणे महानगर पालिकेत काम करण्याची उत्तम संधी मिळालेली आहे, तसेच सगळ्यांना बरोबर घेऊन काम करणार आहे.
या प्रसंगी अतिरिक्त महापालिका आयुक्त, उपआयुक्त व खातेप्रमुख उपस्थित होते.नवल किशोर राम यांनी यापूर्वी पुण्याचे जिल्हाधिकारी म्हणून काम पाहिले आहे. त्यांनतर त्यांची दिल्ली येथील पंतप्रधान कार्यालयात उपसचिव म्हणून नियुक्ती झाली होती. आता ते केंद्रीय प्रतिनियुक्तीवरून परत येत राज्य शासनाच्या सेवेत रुजू होत आहेत. पुणे महापालिकेच्या कारभारात प्रशासनिक अनुभव असलेले आणि लोकाभिमुख कार्यपद्धती असलेले नवल किशोर राम यांची आयुक्तपदी झालेली ही नियुक्ती पुण्यासाठी महत्त्वपूर्ण ठरणार आहे.त्याचबरोबर पुणे महापालिकेच्या अतिरिक्त आयुक्त म्हणून काही वर्षे काम केलेल्या आणि नंतर बदली होऊन गेलेल्या शितल तेली उगळे (Sheetal Teli-Ugale) यांच्याकडे पुण्यातील क्रीडा आणि युवा आयुक्त पदाची जबाबदारी देण्यात आली आहे.
पुणे महापालिकेचे विद्यमान आयुक्त डॉ. राजेंद्र भोसले आज 31 मे 2025 रोजी सेवानिवृत्त झाले आहेत. त्यांच्या निवृत्तीमुळे रिक्त होणाऱ्या पदावर भारतीय प्रशासन सेवेतील (IAS) अधिकारी नवल किशोर राम यांची नियुक्ती करण्यात आली आहे. राज्य सरकारने दिलेल्या आदेशानुसार, नवल किशोर राम यांनी आज 31 मे रोजी डॉ. भोसले यांच्याकडून पदभार स्वीकारला . सामान्य प्रशासन विभागाचे अपर मुख्य सचिव राजेश कुमार यांनी यासंदर्भातील आदेश जारी केले होते .
नवल किशोर राम हे 2008 च्या आयएएस बॅचचे अधिकारी असून ते मूळचे बिहार राज्यातील आहेत. 2007 साली त्यांनी भारतीय शासकीय सेवेत प्रवेश केला. नांदेड जिल्हाधिकारी कार्यालयात त्यांच्या सेवेला सुरुवात झाली. यानंतर त्यांनी यवतमाळ जिल्हा परिषदेत मुख्य कार्यकारी अधिकारी, तसेच बीड व संभाजीनगर जिल्हाधिकारी पदावर काम पाहिले आहे.
