४७३ वाहने स्क्रॅप करून महापालिकेने मिळविले ८.१३ कोटी

पुणे- महानगरपालिकेच्या मालकीची १५ वर्षे आयुर्मान संपलेली एकूण ४७३ वाहने केंद्र सरकारच्या सन २०२१ च्या वाहन निरस्त करावयाच्या धोरणानुसार निरस्त करण्यात आली होती. सदर वाहनांच्या विक्रीसाठी पुणे मनपाच्या अपसेट कमिटीने एकत्रित र.रू ६.३३ कोटी इतकी अपेक्षित रक्कम निर्धारित केली होती.या वाहनांचा दि. २५/०३/२०२५, दि.२८/०३/२०२५ व ०३/०४/२०२५ रोजी एमएसएसटीसी ई कॉमर्स या वेब पोर्टलद्वारे इ-लिलाव करण्यात आला असून सदर लिलाव प्रक्रियेमध्ये रजिस्टर व्हेईकल स्क्रैपिंग फॅसिलीटी असणाऱ्या तीन कंपन्या सहभागी झाल्या होत्या. या तीन कंपनीच्या माध्यमातून सदर वाहनांची खरेदी करण्यात आली आहे. सदर लिलाव प्रक्रियेत पुणे मनपास जीएसटी सह एकूण र.रू. ८.१३ कोटी इतके उत्पन्न प्राप्त झाले असून तीनही कंपन्याद्वारे सदरची रक्कम महानगरपालिकेच्या कोषागारात जमा केलेली आहे.
या वाहनांची संबंधित कंपन्याना डिलीव्हरी देण्याची प्रक्रीया दोन दिवसात सुरू होणार आहे. सद्यस्थितीत सदर वाहने एच एम पार्किंग, कोंढवा येथील सुमारे ४.५ एकर जागेवर उभी करण्यात आली असून सदर वाहनांमुळे स्थानिक शाळा व रहिवासी वसाहत यांना होत असलेल्या त्रासाबाबत पुणे महानगरपालिकेकडे वेळोवेळी तक्रारी प्राप्त होत होत्या, सदर वाहने डिलीव्हरीची प्रक्रिया पूर्ण झालेनंतर सदर जागा पूर्णपणे मोकळी होणार असून त्यामुळे नागरिकांना होणारा त्रास पूर्णतः बंद होणार आहे.