अजित पवारांनी काकांना आशीर्वादापुरते मर्यादीत ठेवले:देवेंद्र फडणवीसांची कोपरखळी; वक्फ बिलावरून उद्धव ठाकरेंना टोला

मुंबई-अजित पवारांनी त्यांच्या काकांना आशीर्वादापुरते मर्यादीत ठेवले असल्याचे मुख्यमंत्री देवेंद्र फडणवीस यांनी म्हटले आहे. या माध्यमातून त्यांनी अजित पवार यांना शरद पवार यांना कोपरखळी लगावली आहे. तसेच वक्फ बोर्ड सुधारणा विधेयकावरून त्यांनी उद्धव ठाकरे यांना टोला लगावला. बाळासाहेब ठाकरे यांचा अंश जरी बाकी असेल तर उद्धव ठाकरे गटाने या विधेयकाचे समर्थन करण्याची मागणी फडणवीस यांनी केली आहे. वक्फ बोर्ड सुधारणा विधेयकावर बोलताना मुख्यमंत्री देवेंद्र फडणवीस म्हणाले की, भारतीय संविधानामध्ये धर्मनिरपेक्ष हा शब्द वापरला गेला आहे. त्याच प्रत्यंतर आपल्याला या बिलामध्ये पाहायला मिळत असल्याचे मुख्यमंत्री देवेंद्र फडणवीस यांनी म्हटले आहे. या संदर्भातील कायद्यामध्ये अमर्याद अधिकार होते. चुकीच्या पद्धतीने निर्णय झाला तर त्या निर्णया विरोधात न्यायालयात जाण्याची देखील मुभा नव्हती. आता या सुधारणामुळे ती मुभा दिलेली आहे. तसेच चुका सुधारण्याची संधी दिलेली आहे. विशेषतः महिलांना प्रतिनिधित्वाची संधी मिळाली असल्याचे फडणवीस यांनी म्हटले आहे. देशातून तीन तलाक हद्दपार झाल्यानंतर मुस्लिम महिलांना देखील यात प्रतिनिधित्व मिळत आहे. हे अतिशय पुरोगामी पाऊल असल्याचा दावा देवेंद्र फडणवीस यांनी केला आहे. हे विधेयक कोणत्याही समाजाच्या विरोधात नाही. कोणत्याही समाजाच्या धार्मिक आस्थांच्या विरोधात नाही. तर पूर्वी झालेल्या चुकांचा फायदा काही लोक घेत होते. त्यातून मोठ्या प्रमाणात जमिनी लाटत होते. त्यांच्यावर मात्र यामुळे टाच येणार आहे. त्यामुळे या बिलाचे मी स्वागत करत असल्याचे देवेंद्र फडणवीस यांनी म्हटले आहे. ज्यांची – ज्यांची सदसदविवेक बुद्धी जागृत आहे. ते सर्व या बिलाला समर्थन करतील, असा विश्वास देखील त्यांनी व्यक्त केला. हे बिल संसदेत मांडण्यात आले असून त्यावर चर्चा सुरू आहे. याचा मला आनंद असल्याचे फडणवीस म्हणाले. तसेच हे बिल नक्कीच मंजूर होईल, असा विश्वास देखील त्यांनी व्यक्त केला. बाळासाहेबांच्या विचाराचा अंश असेल तरी ठाकरे गट समर्थन करेल विरोधकांनी आपल्या छातीवर हात ठेवून निर्णय घेतला तर ते या बिलाच्या बाजूनेच निर्णय घेतील. मात्र त्यांना केवळ लांगुलचलन करायचे असल्यामुळे ते या बिलाला विरोध करत असल्याचा आरोप फडणवीस यांनी केला आहे. ज्यांची- ज्यांची सदसदविवेक बुद्धी जिवंत असेल आणि विशेषतः उद्धव बाळासाहेब ठाकरे पक्षाच्या संदर्भात जर हिंदूहृदयसम्राट शिवसेनाप्रमुख बाळासाहेब ठाकरे यांच्या विचारांवर अजूनही चालण्याची इच्छा असेल तर मला अपेक्षा आहे की, ते या विधेयकाला समर्थन करतील आणि या बिलाला विरोध करणार नाहीत. असे देखील देवेंद्र फडणवीस यांनी म्हटले आहे. बाळासाहेब ठाकरे यांच्या विचाराचा थोडा अंश जरी बाकी असेल तरी उद्धव ठाकरे गट या विधेयकाचे समर्थन करेल असे देखील फडणवीस यांनी म्हटले आहे. काकांना त्यांनी आशीर्वाद पुरतेच मर्यादीत ठेवले काकांच्या आशीर्वादाने माझे सर्व चांगले चालू असल्याचे अजित पवार यांनी बीड जिल्हा दौऱ्यावर असताना म्हटले होते. यावर देवेंद्र फडणवीस यांना प्रश्न विचारण्यात आला. काकांना त्यांनी आशीर्वाद पुरतेच मर्यादीत ठेवले असल्याचे फडणवीस यांनी म्हटले आहे. मोठ्यांचा आशीर्वाद घेणे ही चांगली गोष्ट असल्याचे देखील ते म्हणाले महाराष्ट्रात मराठीचा आग्रह चुकीचा नाही मराठीच्या विषयावर सरकारची भूमिका पक्की आहे. महाराष्ट्रात मराठीचा आग्रह चुकीचा नाही. तो आग्रह कोणी धरत असेल तर ते योग्यच आहे. मात्र त्या आग्रहासाठी कोणी कायदा हातात घेतला तर त्यावर कायदेशीर कारवाई होईल, असा इशारा देखील देवेंद्र फडणवीस यांनी दिला आहे. महाराष्ट्र नवनिर्माण सेनेच्या वतीने मराठीच्या आग्रहासाठी बँकांची झाडाझडती घेण्याचे आदेश राज ठाकरे यांनी दिले होते. यावर फडणवीस यांनी ही प्रतिक्रिया दिली आहे.