मुंबई-शिवसेना उद्धव बाळासाहेब ठाकरे पक्षाच्या उपनेत्या सुषमा अंधारे यांनी स्टँडअप कॉमेडियन कुणाल कामराचे वादग्रस्त गाणे गात उपमुख्यमंत्री एकनाथ शिंदे यांच्यावर निशाणा साधला आहे. या प्रकरणी त्यांनी शिंदे गटाच्या कार्यकर्त्यांचा चिमटा काढत त्यांना आता छत्रपती शिवाजी महाराजांचा अवमान करणाऱ्या आपटे, सोलापूरकर व कोरटकर यांच्याकडे केव्हा तोडफोड करायची असा सवाल केला आहे.
सुषमा अंधारे कुणाल कामराचे विडंबनात्मक गाणे गात म्हणाल्या,
ठाणे की रिक्शा चेहरे पर दाढ़ी, आंखों पर चश्मा हाय ! एक झलक दिखलाए कभी, गुवाहाटी में छुप जाए। मेरी नजर से तुम देखो गद्दार नजर वो आए ठाणे की रिक्शा, चेहरे पर दाढ़ी , आंखों ओआ चश्मा हाय। मंत्री नही है वो दल बदलू हैं और कहा क्या जाए, जिस थाली में खाये उसमें ही वो छेद कर जाए मंत्रालय से ज्यादा फडणवीस की गोदी में मिल जाए। तीर कमान मिला है इसको बाप मेरा ये चाहे ठाणे की रिक्शा चेहरे पर दाढ़ी, आंखों पर चश्मा हाय !
सुषमा अंधारे पुढे म्हणाल्या, चिडचिड होत आहे? बापरे… प्रचंड चिडचिड होत आहे, तोडफोड होत आहे. पण साधा प्रश्न आहे माझा… जेव्हा भगतसिंह कोश्यारी यांनी छत्रपती शिवाजी महाराज व डॉक्टर बाबासाहेब आंबेडकर यांच्याविषयी अत्यंत अवमानकारक वक्तव्य केली तेव्हा ही चिडचिड कुठे गेली होती? आपटेंमुळे छत्रपती शिवरायांचा पुतळा पडला तेव्हा त्या आपटेचे कार्यालय तुम्ही का फोडले नाही? राहुल सोलापूरकर यांनी छत्रपती शिवरायांनी लाच घेतली असा खोटा इतिहास सांगण्यास सुरुवात केली तेव्हा सोलापूरकरचे कार्यालय किंवा ते ज्या भांडारकर ट्रस्टमध्ये होते ते तुम्ही का फोडायला गेला नाही.प्रशांत कोरटकरने चक्क शिवाजी महाराजांच्या जैविक वडिलांपर्यंत पोहोचण्याची भाषा केली. त्यावेळी प्रशांत कोरटकरला फोडण्यासाठी तुमचे हात का शिवशिवले नाहीत? एवढ्या सगळ्या गोष्टी तुम्ही सहन केल्या. आता एखादा कलाकार अत्यंत उपहासाने वस्तुस्थिती मांडत असेल, तर तुम्हाला एवढ्या मिर्च्या का लागल्या? येस वुई सपोर्ट कुणाल कामरा, असे सुषमा अंधारे सत्ताधारी शिवसेनेवर टीका करताना म्हणाल्या.
