रोहित पवारांचा हल्लाबोल
पुणे-छावा चित्रपटाविरोधात भाष्य केल्याप्रकरणी प्रशांत कोरटकर नामक एका व्यक्तीने इतिहास संशोधक इंद्रजीत सावंत यांना धमकी दिल्याची गंभीर बाब उजेडात आली आहे. सावंत यांनी स्वतः या प्रकरणी एक ऑडिओ क्लिप सार्वजनिक केली आहे. मुख्यमंत्र्यांचे नाव घेऊन प्रशांत कोरटकर नावाचा एक परशूरामी ब्राह्मण धमक्या देत आहे. मला अशा धमक्या नवीन नाहीत. पण या लोकांच्या मनात शिवाजी महाराजांविषयी किती विष भरलेले आहे हे झोपलेल्या मराठा बहुजनांना समजावे म्हणून मी ही रेकॉर्डिंग व्हायरल करत आहे, असे सावंत यासंबंधी म्हणाले होते. मात्र कोरटकर यांनी हा आरोप फेटाळून लावला आणि आपल्या नावाने इतर कोणीतरी हा प्रकार केला असल्याचे स्पष्टीकरण दिल्यावर कोरटकर यांना सत्ताधारी भाजपने संरक्षण पुरविले आहे. या पार्श्वभूमीवर आज रोहित पवार यांनी २ पोस्ट करत हल्लाबोल केला आहे
राष्ट्रवादी कॉंग्रेसचे नेते रोहित पवार यांनी दुसऱ्या पोस्ट मध्ये म्हटले आहे कि,’
ज्या महेश मोतेवारने लाखो लोकांना हजारो कोटींचा गंडा घातला त्याच्या गाड्या आणि पैसे कोरटकरकडे असून महाराष्ट्राची अस्मिता असलेल्या शिव-शाहू-फुले-आंबेडकरांचा अपमान करणाऱ्या माजी राज्यपाल कोशारी साहेबांपासून तर केंद्र तसेच राज्य सरकारमधील मोठ्या नेत्यांसोबत कोरटकरची उठबस असल्याची माहिती समोर येत आहे, शिवाय गुवाहाटीत देखील कोरटकर हजर होता, अशी चर्चा आहे.कदाचित सत्तेतील नेत्यांशी उठबस असल्याने आपल्याला कोणीही काही करू शकत नाही याचा विश्वास कोरटकरला आहे, म्हणूनच कोरटकर सारख्या विकृत प्रवृत्तींची हिम्मत वाढत असावी. महान व्यक्तींच्या नावाने राजकारण करणारे हे सरकार महान व्यक्तींचा अपमान करणाऱ्या कोरटकरसारख्या प्रवृत्तींना खाक्या दाखवणार की त्याची सेवा करण्यातच धन्यता मानणार हे पहावं लागेल..नेत्यांवर टीका केली म्हणून धरपकड करणारे सरकार महान व्यक्तींबद्दल अभद्र भाषा वापरणाऱ्या विकृतांवर कारवाई करत नाही, हे मात्र दुर्दैव आहे!
तत्पूर्वीच्या आजच्या पहिल्या एका पोस्ट मध्ये रोहित पवार यांनी असेही म्हटले आहे कि,’पुण्यात एका अत्यंत मोठ्या गुंडाला मंत्र्याच्या एका फोनवर मकोका लावून अर्ध्या तासात पकडले जाते, परंतु मस्साजोग प्रकरणात अडीच महिने उलटूनही आरोपी सापडत नाही, परभणी प्रकरणाचा तपास पुढे सरकत नाही, याचा अर्थ काय घ्यावा? पोलीस यंत्रणा फक्त राजकीय आदेशावरच चालणार का? की राजकीय हस्तक्षेप कारवाईच्या आड येतो?
जीवे मारण्याची धमकी आली इंद्रजीत सावंतांना आणि पोलीस सुरक्षा देताय धमकी देणाऱ्याला! छत्रपती शिवाजी महाराज, छत्रपती शंभू राजे यांच्याबद्दल बदनामीकारक शब्द वापरणाऱ्या नतद्रष्टावर कारवाई करण्याऐवजी त्याला सुरक्षेचं कवच?
