साहित्ययात्री रंगले साहित्यानंदात

मराठी साहित्ययात्री संमेलनात सुरू आहे मराठीचा जागर..
महादजी शिंदे एक्स्प्रेसमधून : दिल्लीतील साहित्य संमेलनातून परतीच्या वाटेवर असलेल्या साहित्यिक, साहित्य रसिकांचे फिरत्या चाकांवरील मराठी साहित्ययात्री संमेलनात मराठीचा जागर सुरूच आहे. पोवाडे, अभंग, कथाकथन, कविता वाचन असे उपक्रम उत्साहाने सुरू आहेत. पुणे ते दिल्ली आणि दिल्ली ते पुणे या विशेष रेल्वेत हे साहित्ययात्री संमेलन सुरू असून ही विशेष रेल्वे पुण्यात पोहोचल्यानंतर संमेलनाचा समारोप होणार आहे. या विशेष रेल्वेला शूर सेनानी महादजी शिंदे यांचे नाव देण्यात आले आहे. तर बोग्यांना छत्रपती शिवाजी महाराज यांच्या गड-किल्ल्यांची नावे देण्यात आली आहेत.
महाराष्ट्राच्या कानाकोपऱ्यातून आलेले साहित्यिक, साहित्य रसिकांनी महादजी शिंदे एक्स्प्रेसमधून दिल्लीत आल्यानंतर 98व्या अखिल भारतीय मराठी साहित्य संमेलनात उत्साहाने भाग घेतला. रविवारी सायंकाळी संमेलनाचा समारोप झाल्यानंतर दिल्ली येथून रात्री 11:30 वाजता ही विशेष रेल्वे पुण्याकडे निघाल्यानंतर साहित्ययात्री संमेलनचा दुसरा टप्पा सुरू झाला. या संमेलनाचे अध्यक्ष लेखक शरद तांदळे आहेत, तर वैभव वाघ हे कार्यकारी अध्यक्ष आहेत.
सोमवारची सकाळ अभंग, भजन, कीर्तनासह, पोवाड्याच्या सादरीकरणाने भक्ती आणि वीररसात चिंब झाली. ‌‘वाटेवरचा देवनाम‌’, ‌‘एका जनार्दनी शिव‌’, ‌‘ॐ नमो ज्ञानेश्वरा, करूणाकरा दयाळा‌’ आदी भक्तीगीते सादर करण्यात आली. विविध बोग्यांमध्ये सुरू असलेले कविता, कथा वाचन तसेच विविध कलांच्या सादरीकरणातून रसिकांना विविध साहित्य, कलाकृतींची आनंद मिळत आहे. ढोल-ताशा पथकातील वादक तसेच अनेक हौशी कलाकारही मोठ्या उत्साहाने कला सादर करत आहेत. त्यामुळे साहित्य संमेलनाचा आनंददायी प्रवास सुरूच आहे.
नाशिक येथील वारकऱ्यांनी अभंग, हरिपाठ आणि भजन सादर केले. यात राजेंद्र सपकाळ, बाळासाहेब फराटे, सुखदेव सांगळे, लक्ष्मी घुले यांचा सहभाग होता. सिंहगर्जना ढोल-ताशा पथकाच्या वादकांनीही कला सादर केली. सोलापूरचे कवी सुरेशकुमार लोंढे, बेळगावचे कवी महादेव खोत, कोल्हापूरचे कवी मकरंद वागणेकर यांनी कवितांचे वाचन केले. रेल्वेत प्रवाशांची काळजी घेणाऱ्या स्वयंसेवकांनी सामुहिक नृत्य-वादन करून सर्वांचे मनोरंजन केले. आटपाडीचे ढोलकी वादक सिद्धनाथ जावीर व माळशीरसचे संवदिनीवादक राजवर्धन वाघमारे यांच्या साथीने प्रवाशांनी भक्तीरचना सादर केल्या.
पुणे ते दिल्ली आणि परतीच्या प्रवासादरम्यान सरहद, पुणेच्या वतीने प्रवाशांच्या दिमतीला अनेक कार्यकर्ते मनापासून झटत आहेत. तसेच कर्तव्य मेडिकल असोसिएशनचे डॉक्टरांचे पथक असून या पथकात आठ जणांचा समावेश आहे. रेल्वेत हे पथक प्रवाशांची सतत विचारपूस करत आहेत आणि कोणाला आरोग्याची समस्या जाणवल्यास त्यांना वैद्यकीय मदत करत आहेत. डॉ. फैज सय्यद, डॉ. ऋषिकेश पाटील, डॉ. यश थोरात, डॉ. क्षितिज कुचेकर यांच्यासह गौरव गायकवाड, अनिकेत मोगरे, गणेश जानकर, यशवंत पवार यांचा वैद्यकीय पथकात समावेश आहे.