मुंबई-उद्धवसेनेत 2 मर्सिडीझ दिल्या की 1 पद मिळते, असा खळबळजनक आरोप शिंदे गटाच्या नेत्या आणि उपसभापती नीलम गोऱ्हे यांनी केला होता. यानंतर ठाकरे गट आक्रमक झाला असून राज्यातील राजकारण चांगलेच तापले आहे. नीलम गोऱ्हे यांनी केलेल्या वक्तव्यासंदर्भात ठाकरे गटाच्या उपनेत्या सुषमा अंधारे त्यांच्याविरोधात अब्रूनुकसानीचा दावा दाखल करणार आहे. ठाकरेंच्या शिवसेना पक्षाची आणि पक्षप्रमुखांची प्रतिमा मलिन करण्याच्या हेतूने नीलम गोऱ्हे यांनी जाणीवपूर्वक बेताल वक्तव्य केल्याचा आरोप सुषमा अंधारे यांनी केला आहे.
नीलम गोऱ्हे यांनी जाणीवपूर्वक एक उदात्त आणि भव्यदिव्य परंपरा असणाऱ्या पक्षाची आणि पक्षप्रमुखांची प्रतिमा मलीन करण्याच्या हेतूने काल अत्यंत बेताल वक्तव्य केले. सत्ताधारी पक्षांना खुश करून राज्यसभा किंवा मंत्रीपद पदरात पाडून घ्यायचे असतील तर त्यांनी ती खुशाल पाडून घ्यावीत. मात्र त्यासाठी सत्ताधाऱ्यांचे लांगूलचालन करताना त्यांनी पक्ष आणि पक्षप्रमुखांवर चिखलफेक करण्याचा प्रयत्न केला आहे तो अत्यंत अश्लाघ्य असल्याचे सुषमा अंधारे म्हणाल्या. त्यांचे हे बेताल वक्तव्य वंदनीय बाळासाहेब यांनी जोपासलेल्या परंपरेच्या मुळावरचा घाव आहे, अशी टीकाही अंधारे यांनी केली.
महाराष्ट्रातल्या लाखो शिवसैनिकांनी जीवाचे रान करून जो पक्ष उभा केला त्या पक्षाच्या जीवावर तब्बल चार वेळा आमदारकी भोगली. मोबदल्यात एक नगरसेवकच काय साधी पक्षाची एक शाखा आपल्या राहत्या भागात उभी करू न शकणाऱ्या कर्तृत्वशून्य महिलेकडून झालेली चिखलफेक महाराष्ट्र तथा मराठी मनाला दुखावणारी आहेत. पक्षाची प्रवक्ता आणि महाराष्ट्रातला मराठी माणूस म्हणून नीलम गोऱ्हे यांच्यावर अब्रू नुकसानीचा दावा दाखल करत आहे, असे सुषमा अंधारे म्हणाल्या.
नीलम गोऱ्हे 25 वर्षांपासून पक्षात होत्या. त्यांच्या काळात असे काही झाले असेल, तर निश्चितच त्या त्याच्या लाभार्थी असतील. कलेक्शनचे काम एकनाथ शिंदेंकडे होते असेही काल त्या म्हणाल्या. त्यामुळे नेमके किती कलेक्शन झाले याबाबत दोघांनाही माहिती असेल. नीलम गोऱ्हेंनी सांगितलेले कलेक्शन किती आहे, काय काय आहे, त्याची टिपणे जाहीर करण्याची जबाबदारी एकनाथ शिंदेंची आहे, असे सुषमा अंधारे म्हणाल्या.
नीलम गोऱ्हे यांना त्यांचे म्हणणे कोर्टात सिद्ध करावे लागेल. अन्यथा नाक घासून माफी मागावी लागेल, असा इशारा सुषमा अंधारे यांनी केला. माझी लिगल टीम सर्व गोष्टींवर काम करत आहे. लिगल टीमचे फायनल ड्राफ्टींग माझ्या हातात आल्यानंतर किती रुपयांचा दावा ठोकायचा याबाबतची माहिती पोहोचवेल, असे सुषमा अंधारेंनी सांगितले.
नीलम गोऱ्हे आमचे देणे लागतात. कर्तृत्व नसताना त्यांनी अनेक लोकांची संधी अडवून अनेक पदे उपभोगली. भारीप बहुजन महासंघापासून ते आतापर्यंत त्यांनी काय केले आणि काय नाही, या सगळ्या गोष्टी बाहेर काढाव्या लागतील. नीलम गोऱ्हेंनी तशी वेळ येऊ देऊ नये, असा इशाराही सुषमा अंधारे यांनी नीलम गोऱ्हे यांना दिला.
