पुणे, दि. २३ फेब्रुवारी २०२५: मरकळ-आळंदी दरम्यान एका शेतात टॉवर लाइनखाली ऊस पेटवल्यामुळे महापारेषणच्या लोणीकंद-तळेगाव ४०० केव्ही टॉवर लाइनमध्ये ट्रिपिंग आले. परिणामी ३१४ मेगावॅटची तूट निर्माण झाली आणि स्वयंचलित भारव्यवस्थापन यंत्रणा (एलटीएस) कार्यान्वित होऊन पिंपरी चिंचवड, चाकण एमआयडीसी व परिसर, भोसरी व भोसरी एमआयडीसी परिसरातील सुमारे १ लाख ८९ हजार ९०० ग्राहकांचा वीजपुरवठा रविवारी (दि. २३) सकाळी १०.०९ ते ११.०६ वाजेपर्यंत खंडित झाला होता.
याबाबत माहिती अशी की, महापारेषण कंपनीच्या लोणीकंद-तळेगाव ४०० केव्ही टॉवर लाइनमध्ये सकाळी १०.०९ वाजता ट्रिपिंग आल्यामुळे तब्बल ३१४ मेगावॅटची पारेषण तूट निर्माण झाली. परिणामी तळेगाव-चाकण ४०० केव्ही टॉवर लाइनच्या वीजभारात मोठी वाढ झाली. पारेषण यंत्रणेतील संभाव्य धोके व बिघाड टाळण्यासाठी स्वयंचलित भारव्यवस्थापन यंत्रणा म्हणजेच ‘एलटीएस’ (Load Trimming Scheme) यंत्रणा कार्यान्वित झाली. त्यामुळे महापारेषण कंपनीच्या चाकण ४०० केव्ही, चाकण २२० केव्ही, चिंचवड २२० केव्ही, भोसरी २२० केव्ही आणि ब्रीज स्टोन २२० केव्ही अशा ५ अतिउच्चदाब उपकेंद्रांचा वीजपुरवठा बंद झाला. सोबतच या उपकेंद्रांतून महावितरणच्या १६ उपकेंद्रांना व १२९ वीजवाहिन्यांना होणारा वीजपुरवठा देखील खंडित झाला.
एलटीएस कार्यान्वित झाल्यामुळे चाकण एमआयडीसी तसेच शिंदेगाव, सावरदरी, वराळे, वासुली, येलवाडी, खालुंब्रे, संगुर्डी, एमआयडीसी फेज दोन, भांबोरी, कुरुळी, नाणेकरवाडी, चिंबोली, निघोजे आदी गावांतील ९०० उच्चदाब व ४ हजार लघुदाब औद्योगिक ग्राहक आणि ३५ हजार घरगुती व व्यावसायिक ग्राहकांचा वीजपुरवठा तासभर खंडित होता. तसेच पिंपरी चिंचवड शहर, भोसरी गाव, भोसरी एमआयडीसी, पुनावळे, ताथवडे, रहाटणी, थेरगाव, तुकाराम नगर, प्राधीकरण, नाशिक रोड, इंद्रायणीनगर, लांडेवाडी, ब्लॉक टी, जे व एस आदी परिसरातील सुमारे दीड लाख वीजग्राहकांचा वीजपुरवठा सकाळी १०.०९ ते ११ वाजेपर्यंत बंद होता.
लोणीकंद-तळेगाव ४०० केव्ही टॉवर लाइनला ट्रिपिंग आल्यामुळे महापारेषणच्या अभियंते व कर्मचाऱ्यांनी युद्धपातळीवर पाहणी सुरू केली. यामध्ये मरकळ-आळंदी मार्गावर एका शेतात टॉवर लाइनखालीच ऊस पेटवल्यामुळे हा प्रकार घडल्याचे निदर्शनास आले. पेटवलेल्या ऊसाच्या धुरामध्ये बाष्प असल्यामुळे ४०० केव्ही लाइनमध्ये ट्रिपिंग आले. ऊसाची आग तातडीने विझवल्यानंतर त्या ठिकाणच्या टॉवर लाइनची तपासणी करून वीजपुरवठा पूर्ववत सुरू करण्यात आला.
