औरंगजेबावर वाद होण्याची शक्यता
मुंबई-माजी क्रिकेटपटू तथा सुप्रसिद्ध समालोचक आकाश चोप्रा यांनी छावा चित्रपट पाहिल्यानंतर छत्रपती संभाजी महाराज यांचा इतिहास आम्हाला शाळेत का शिकवला नाही? असा खडा सवाल केला आहे. त्याने यासंबंधीच्या आपल्या पोस्टमध्ये मोगल बादशहा औरंगजेबाचा उल्लेख केल्यामुळे वाद होण्याची शक्यता आहे.
लक्ष्मण उतेकर दिग्दर्शित छावा चित्रपट नुकताच प्रदर्शित झाला. या चित्रपटात अभिनेता विकी कौशल याने छत्रपती संभाजी महाराज, अभिनेत्री रश्मिका मंदाना हिने महाराणी येसूबाई व अभिनेता अक्षय खन्ना याने औरंगजेबाची भूमिका साकारली आहे. समालोचक आकाश चोप्रा यांनी हा चित्रपट नुकताच पाहिला. त्यानंतर एका पोस्टद्वारे त्यांनी उपरोक्त सवाल केला. त्यावर सोशल मीडियात गरमागरम चर्चा रंगली आहे.
आकाश चोप्रा आपल्या पोस्टमध्ये म्हणाले, मी छावा चित्रपट पाहिला. शौर्य व अतुलनीय पराक्रम, देशाप्रती कर्तव्य दाखवताना ज्या निस्वार्थी वृत्तीचे दर्शन झाले, त्यावरून मला काही प्रश्न पडलेत. छत्रपती संभाजी महाराजांचा इतिहास आम्हाला शाळेत का शिकवण्यात आला नाही? त्यांचा इतिहासाच नाही, तर त्यांचा साधा उल्लेखही कुठे नाही. आपल्याला केवळ अकबर कसा मोठा व न्यायप्रिय राजा होता हेच शिकवले गेले. राजधानी दिल्लीतील एका रस्त्याचे नाव औरंगजेब आहे. हे सर्व का व कसे घडले?
