मुंबई- उपमुख्यमंत्री एकनाथ शिंदे मला तुमचा अभिमान आहे, तुम्ही सगळ्यांच्या बोलण्याला तोंड दिले आणि यशस्वी झाला. चांगले काम करत राहा. शतायुषी व्हा, चांगले काम केल्याने कुणी कधी संपत नाही, असे म्हणत आशा भोसले यांनी वाढदिवसाच्या शुभेच्छा देताना एकनाथ शिंदेंना मोलाचा सल्ला दिला आहे.
दरम्यान आशा भोसले पुढे बोलताना म्हणाल्या की, तुम्ही मला फार आवडता. तुम्ही अचानक वरती आलात, आम्हाला माहित नव्हते तुम्ही काम करत होतात. तुम्ही अचानक वर आलात आणि जशी बाळासाहेबांनी एकट्याने शिवसेना घडवली, तशी तुम्ही पुन्हा एकट्याने शिवसेना घडवली, त्यामुळे मला तुमचा अभिमान आहे.आशा भोसले म्हणाल्या की, ज्या हिंमतीने तुम्ही आलात, लोकांच्या बोलण्याला तु्म्ही तोंड दिले, सगळे तुमच्यावर धावून आले होते, त्यावेळी तुम्ही परिस्थितीला तोंड दिले आणि यशस्वी झालात आणि आणखी यशस्वी व्हाल, असा माझा तुम्हाला आशीर्वाद आहे. शतायुषी व्हा आणि असेच कार्य करत राहा. चांगले कार्य केल्याने कुणीही कधीही संपत नाही.
