पुणे: शिवसेना उद्धव बाळासाहेब ठाकरे पक्षाचे हडपसर चे माजी आमदार महादेव बाबर यांनी उपमुख्यमंत्री एकनाथ शिंदेंच्या शिवसेनेत प्रवेश करण्याचा निर्णय घेतल्याचे वृत्त आहे. त्यांनी नुकतीच एकनाथ शिंदे यांची भेट घेतली.
महादेव बाबर हडपसर विधानसभा मतदारसंघाचे माजी आमदार आहेत. यंदाही ते विधानसभा निवडणूक लढण्यास उत्सुक होते. पण महाविकास आघाडीत ही जागा राष्ट्रवादी काँग्रेस शरदचंद्र पवार पक्षाला सुटली. त्यामुळे बाबरांची विधानसभा निवडणूक लढण्याची संधी हुकली. त्यानंतर बाबर नाराज झाले होते. विधानसभा निवडणुकीत ठाकरेंच्या पक्षाचं पानीपत झाल्यानंतर बाबर यांनी आता शिंदेंच्या शिवसेनेचा रस्ता धरला आहे.फेब्रुवारीच्या पहिल्या आठवड्यात २५ माजी सर्वपक्षीय नगरसेवकांना घेऊन शिंदेंच्या शिवसेनेत प्रवेश करणार असल्याचं बाबर यांनी सांगितलं. पुण्यात ठाकरेंना सातत्यानं धक्के बसत आहेत. आता बाबर यांनी पक्षाला जय महाराष्ट्र केल्यानं धक्क्यांची मालिका सुरुच आहे. आधी ५ माजी नगरसेवकांनी ठाकरेसेनेची साथ सोडली. त्यानंतर ३०० ते ४०० शाखाप्रमुख, विभागप्रमुखांनी पक्ष सोडला. यानंतर आता माजी आमदार महादेव बाबर यांनी शिवबंधन सोडलं आहे.महादेव बाबर २००९ मध्ये शिवसेनेच्या तिकिटावर हडपसरमधून निवडून आले. पक्षफुटीनंतर ते ठाकरेंसोबत राहिले. त्यांना विधानसभा निवडणूक लढायची होती. पण जागावाटपात हडपसर मतदारसंघ शरद पवारांच्या पक्षाकडे गेला. प्रशांत जगताप यांनी अजित पवारांचे आमदार चेतन तुपे यांना चांगली लढत दिली. त्यांनी १ लाख २७ हजार ६८८ मतं घेतली. पण त्यांचा ७ हजार १२२ मतांनी पराभव झाला.
