‘प्रत्येक ठिकाणी सरड्यासारखे रंग बदलणारी जमात असते. ती माझ्या पक्षातही आहे. यापुढे हे चालणार नाही. तुमच्या चुकांवर पांघरूण घालून, तुम्हाला पदरात घेऊन माझेच पांघरूण फाटलेय, मलाच पदर उरला नाही. यापुढे चुकीचे वागणाऱ्यांची गय करणार नाही,’ असा शब्दांत उपमुख्यमंत्री तथा बीडचे पालकमंत्री अजित पवार यांनी गुरुवारी राष्ट्रवादीच्या पदाधिकाऱ्यांना सुनावले. जिल्हा नियोजन समितीच्या बैठकीसाठी प्रथमच आलेल्या पवारांनी पक्षाची बैठक घेतली. या वेळी मंत्री धनंजय मुंडेह हजर होते.
वाल्मीक कराड, विष्णू चाटे हे राष्ट्रवादीचे पदाधिकारी खंडणी, खून प्रकरणात अटकेत आहेत. त्यामुळे राष्ट्रवादीची बदनामी झाली. धनंजय मुंडे गोत्यात आले. या पार्श्वभूमीवर पवार म्हणाले, ‘पक्षात व बीडमध्ये गुन्हेगारी कृत्ये खपवून घेणार नाही. आज सत्ता आल्याने हौशे-गवशे मला भेटतात. निवडणुकीपूर्वी ते विरोधात होते?’ असे पवार म्हणाले.
अजित पवारांसोबतचे कार्यक्रम संपल्यानंतर गुरुवारी सायंकाळी धनंजय मुंडे भगवान गडावर मुक्कामी आले. तिथे दर्शन घेऊन त्यांनी महंत नामदेवशास्त्री यांच्याशी गोपनीय चर्चा करून पुढील वाटचालीबाबत त्यांचे मार्गदर्शन घेतले.
बीड जिल्ह्यात उद्योगपती गुंतवणूक करतील. पवनचक्की, सौरऊर्जेचे प्रकल्प येत आहेत. या उद्योगपतींकडून खंडणी मागणाऱ्यांना, त्यांचा रस्ता अडवणाऱ्यांना माफ केले जाणार नाही, रिव्हॉल्व्हरच्या रील्स काढण्याचे प्रकार यापुढे दिसले तर त्यांचे लायसन्स रद्द केले जाईल, असा इशाराही अजित पवार यांनी दिला.
जिल्हा नियोजन समितीची बैठक सुरू असताना धनंजय मुंडे व खासदार बजरंग सोनवणे यांच्यात पवारांसमोरच खडाजंगी झाली. बीडच्या अधिकाऱ्यांवर दहशत असल्याचा मुद्दा मुंडे यांनी उपस्थित केला. त्यावर सोनवणे यांनी कुणाची दहशत आहे हे उघड करा, असे विचारले.
बीड जिल्ह्याला बदनाम केले जात असल्याचे मुंडे यांनी सांगताच सोनवणे व आमदार सुरेश धस यांनी मुंडे यांना प्रत्युत्तर देत जिल्ह्यातील सत्य परिस्थिती आम्ही जनतेसमोर मांडत असल्याचे सांगितले. यावरून शाब्दिक खडाजंगी झाली. बैठकीनंतर पत्रकारांशी बोलताना खासदार सोनवणे यांनी बाचाबाची व भांडण झाले नसल्याचे सांगत एवढ्या-तेवढ्या मुद्द्यावरून बोलचाल होतच असते असे सांगितले. तर आमदार धस म्हणाले की, एकमेकांना बोलल्याने लगेच वादावादी होते का? भांडणे लावता का तुम्ही? हे भांडण गुद्द्याचे नाही तर मुद्द्याचे भांडण आहे. मग आम्ही भांडण झाले असे म्हणणार नाही, असे आमदार धस म्हणाले.
