मुंबई–डोंबिवली येथील एका सोसायटीत राहणाऱ्या परप्रांतीयांनी सत्यनारायण व हळदी कुंकू कार्यक्रमाला विरोध केल्याची घटना उजेडात आली आहे. या प्रकरणी सोमवारी रात्री या सोसायटीत प्रचंड वाद झाला. त्यानंतर हे प्रकरण पोलिस ठाण्यात पोहोचले. या घटनेमुळे येथील वातावरण चांगलेच तापले आहे.
डोंबिवलीच्या नांदीवली परिसरातील एका सोसायटीत ही घटना घडली आहे. या सोसायटीतील मराठी कुटुंबातील महिलांनी ए्कत्र येऊन हळदी कुंकू व सत्यनारायणाचा कार्यक्रम आयोजित केला होता. या सोसायटीत राहणाऱ्या काही परप्रांतीय लोकांनी या कार्यक्रमाला विरोध केला. त्यातून सोमवारी रात्री त्यांच्यात मोठा वाद झाला. या वादाचा एक व्हिडिओ सोशल मीडियावर व्हायरल झाला आहे. मराठी भाषिक महिलांच्या मते, आम्ही स्वखर्चाने हळी कुंकू आयोजित केले होते. सोसायटीकडे कोणत्याही प्रकारचा खर्च मागितला नव्हता.
त्यानंतरही संबंधित अमराठी व्यक्तीकडून आमच्या कार्यक्रमाला विरोध करण्यात आला. या व्यक्तीने सोसायटीच्या व्हॉट्सअॅप ग्रुपवर सत्यनारायणाची पूजा व हळदी कुंकू कार्यक्रमावरही हरकत घेतली होती. त्यानंतर आम्ही महिला सोसायटीच्या आवारात एकत्र जमलो असता त्या व्यक्तीने तिथे येऊन आमच्याशी हुज्जत घातली. महिलांनी या प्रकरणी मानपाडा पोलिस ठाण्यात तक्रार दाखल केली आहे.
