पंडित भीमसेन जोशी, पंडित शिवकुमार शर्मा यांना सांगीतिक मानवंदना
पुणे : पंडित शिवकुमार शर्मा यांचे शिष्य कुणाल गुंजाळ यांच्या सुमधुर संतूर वादनाने रसिकांना स्वरांची भुरळ पडली तर पंडित भीमसेन जोशी यांचे नातू विराज जोशी यांच्या सुश्राव्य गायनाने पुणेकर रसिकांची सायंकाळ सुरेल झाली.
निमित्त होते भारतरत्न पंडित भीमसेन जोशी आणि पद्मविभूषण पंडित शिवकुमार शर्मा यांच्या स्मृतींना वंदन करण्यासाठी गायन आणि वादनाच्या सांगीतिक मैफलीचे. भावे पूर्वप्राथमिक शाळेच्या ऑडिटोरियममध्ये या सांगीतिक मैफलीचे आयोजन करण्यात आले होते.
कार्यक्रमाची सुरुवात कुणाल गुंजाळ यांच्या संतूर वादनाने झाली. त्यांनी आपल्या वादन मैफलीची सुरुवात कर्नाटकी राग वाचस्पती याने केली. या मन आणि आत्म्याला प्रफुल्लित करणाऱ्या रागातील पारंपरिक आलाप, जोड, झाला सादर करताना कुणाल गुंजाळ यांनी संतूरच्या तारांवरील नाजूक आघातातून निर्माण होणाऱ्या सुमधूर स्वरांवरील आपली पकड रसिकांना दर्शविली. यानंतर कुणाल यांनी तबल्याच्या साथीने तीन बंदिशी पेश केल्या. झपताल, मध्य लय तीन ताल आणि द्रुत तीन तालात बांधलेल्या या बंदिशी सादर करून त्यांनी रसिकांना स्वराविष्काराची सुंदर अनुभूती दिली. संतूर वादन मैफलीची सांगता कुणाल यांनी मन मोहून टाकणाऱ्या पहाडी धुनने केली. त्यांना तबलावादक रोहित मुजुमदार यांनी समर्पक साथ केली.
कुणाल गुंजाळ हे पंडित शिवकुमार शर्मा यांचे शिष्य असून त्यांचे सध्या परदेशात वास्तव आहे. पुण्यात जवळपास पंधरा वर्षांनंतर वादन करत असल्याचे कुणाल गुंजाळ यांनी आवर्जून सांगितले.
कार्यक्रमाच्या उत्तरार्धात आजच्या पिढीचे आश्वासक युवा गायक विराज जोशी यांनी आपल्या गायनाने रसिकांना सुरांच्या विश्वात खिळवून ठेवले. विराज यांनी आपल्या गायन मैफलीची सुरुवात राग बागेश्रीने केली. त्यांनी आपल्या खुल्या व दमदार आवाजात ‘कौन गत भई री मोरी पिया’ ही पारंपरिक बंदिश सादर केली. याला जोडून द्रुतमध्ये ‘पायल बाजे मोरी झांजर प्यारे’ ही बंदिशी ऐकविली. विराज यांनी आपल्या मैफलीची सांगता संत एकनाथ महाराजांची रचना असलेल्या आणि पंडित भीमसेन जोशींच्या गायनाने सुपरिचित झालेल्या ‘माझे माहेर पंढरी आहे भीवरेच्या तिरी’ या अभंगाने केली. विराज यांना रोहित मुजुमदार (तबला), अमेय बिचू (संवादिनी) यांनी सुरेल साथ केली.
सुरुवातीस सुप्रसिद्ध गायक श्रीनिवास जोशी, शिल्पा जोशी, विख्यात तबला वादक रामदास पळसुले, उल्हास गुंजाळ, पद्मजा गुंजाळ यांच्या हस्ते दिपप्रज्वलन झाले. कलाकारांचा सत्कार श्रीनिवास जोशी यांच्या हस्ते करण्यात आला. कार्यक्रमाचे सूत्रसंचालन डॉ. पूर्वा शहा यांनी केले.
