ठाणे-सरडे रंग बदलतात, पण एवढ्या वेगाने रंग बदलणारे मी पाहिले नाहीत, असा खोचक टोला एकनाथ शिंदे यांनी उद्धव ठाकरे यांना लगावला. एकनाथ शिंदे यांनी ठाण्यात एका कार्यक्रमात माध्यमांशी संवाद साधताना महाविकास आघाडीवर जोरदार टोलेबाजी केली. तसेच बाळासाहेब ठाकरेंच्या स्मारकावरूनही उद्धव ठाकरेंना सुनावले. बाळासाहेबांचे स्मारक हे कुणाच्या मालकीचे नाही, ज्यांनी बाळासाहेबांचे विचार सोडले त्यांना कार्यक्रमाला बोलावणार नाही, असे ते म्हणाले.
राज्यात सरकार स्थापन झाल्यापासून भाजप आणि ठाकरे गटाची जवळीक वाढत असल्याचे दिसून येत आहे. विधीमंडळाच्या अधिवेशनादरम्यान उद्धव ठाकरे यांनी मुख्यमंत्री देवेंद्र फडणवीस यांची भेट घेतली होती. तर आदित्य ठाकरे हे देखील आतापर्यंत तीन वेळा देवेंद्र फडणवीसांच्या भेटीसाठी गेले होते. शिवाय ठाकरे गटाच्या ‘सामना’मधून मुख्यमंत्री देवेंद्र फडणवीस यांचे कौतुक करण्यात आले. या सर्व घडामोडींवर प्रतिक्रिया देताना उपमुख्यमंत्री एकनाथ शिंदे यांनी उद्धव ठाकरेंना उपरोक्त टोला लगावला.महाविकास आघाडी ही फक्त स्वार्थासाठी झाली होती. लोकसभा निवडणुकांमध्ये फेक नरेटीव्ह पसरवून लोकांची दिशाभूल करून मते घेतली. मते मिळाल्यानंतर मतदान करणाऱ्यांच्या पाठीत खंजीर खुपसला, असा हल्लाबोल उपमुख्यमंत्री एकनाथ शिंदे यांनी केला. नागरिकांनी विधानसभेला त्यांना त्यांची जागा दाखवली, अशी टीकाही त्यांनी महाविकास आघाडीवर केली.अडीच वर्ष मी मुख्यमंत्री होतो, मला शिव्या शाप आणि आरोप करण्याशिवाय त्यांनी दुसरे काही केले नाही. देवेंद्र फडणवीस उपमुख्यमंत्री असताना त्यांच्यावर खालच्या पातळीवर जाऊन आरोप केले. त्यांना तुरुंगात टाकण्याचे कारस्थान केले. तू राहशील नाही तर मी राहीन, अशी भाषा वापरली. मी बोलू शकत नाही, असे शब्द वापरले. मात्र, आता काय जादू झाली ते आपण पाहिले. सरडे रंग बदलतात, पण एवढ्या वेगाने रंग बदलणारे मी पाहिले नाहीत, असा टोला एकनाथ शिंदे यांनी उद्धव ठाकरे यांना लगावला.
पुढे बोलताना एकनाथ शिंदे यांनी बाळासाहेब ठाकरेंच्या स्मारकावरून उद्धव ठाकरे यांना सुनावले. समाचार घेतला. बाळासाहेब ठाकरे यांच्या स्मारकाच्या लोकार्पण सोहळ्याला त्यांचे विचार मानणारे येतील. त्यांचे विचार सोडणाऱ्यांचा संबंध नाही, असे विधान उद्धव ठाकरे यांनी केले होते, या विधानाचा शिंदेंनी समाचार घेतला. ज्यांनी बाळासाहेबांचे विचार सोडले, त्यांना कार्यक्रमाला बोलावणार नसल्याचे एकनाथ शिंदे म्हणाले. कार्यक्रम कुणाचा आहे? बाळासाहेबांचे स्मारक कोण बांधतोय? सरकार बांधत आहे. बाळासाहेबांचे स्मारक हे कुणाच्या मालकीचे नाही. त्यामुळे त्यांना हे बोलण्याचा नैतिक अधिकार नाही, अशी टीकाही एकनाथ शिंदे यांनी उद्धव ठाकरेंवर केली.एकनाथ शिंदे यांनी यावेळी संतोष देशमुख हत्या प्रकरणावरही भाष्य केले. या प्रकरणात एसआयटी स्थापन केली आहे. सखोल तपास सुरू आहे. संतोष देशमुख यांचा निर्घृण खून केला आहे. चुकीला माफी नाही, या प्रकरणाशी संबधितांना फासावर लटकवेपर्यंत सरकार पावले उचलेल. सरकार देश्मुख कुटुंबियांच्या पाठीशी आहे. आरोपींवर मकोकाअंतर्गत कारवाई केली जाईल. आरोपी कितीही मोठा असला तरी त्याचे कोणासोबत कितीही लागेबंदे, असले तरी त्याला सोडणार नाही, असे आश्वासन एकनाथ शिंदे यांनी दिले.
