पुणे दि २१: पुणे प्रादेशिक परिवहन कार्यालय येथे लवकरच मालवाहतूक, टुरिस्ट टॅक्सी, बस व ॲम्ब्युलन्स या वाहनांसाठी नवीन मालिका सुरु करण्यात येत आहे. या मालिकेतील आकर्षक नोंदणी क्रमांक तीनपट शुल्क भरून खासगी चारचाकी वाहनांसाठी राखून ठेवण्यासाठी तसेच उर्वरित क्रमांकाबाबत आगाऊ अर्ज स्वीकारण्याची व लिलाव कार्यपद्धतीची प्रक्रिया सुरू करण्यात आली आहे.
नव्याने सुरु होणाऱ्या मालवाहतूक, टुरिस्ट टॅक्सी, बस व ॲम्ब्युलन्स मालिकेतील आकर्षक तसेच पसंतीचे क्रमांक विहित तीनपट शुल्क भरून हवे असतील अशा चारचाकी वाहन मालकांनी २२ फेब्रुवारी रोजी सकाळी ११ ते दुपारी २.३० वाजेपर्यंत विहित नमुन्यात अर्ज करावा. एकाच क्रमांकाकरीता एकापेक्षा जास्त अर्ज आल्यास त्याची यादी २३ फेब्रुवारी रोजी सकाळी १०.३० वा. कार्यालयाच्या सूचना फलकावर प्रसिद्ध करण्यात येणार आहे. या अर्जांसाठी त्याच दिवशी दुपारी ४.३० वाजता परिवहन विभागात लिलाव करण्यात येईल.
मालवाहतूक, टुरिस्ट टॅक्सी, बस व ॲम्ब्युलन्स वाहन मालकांनी आकर्षक तसेच पसंतीचे क्रमांक विहित शुल्क भरून हवे असल्यास २३ फेब्रुवारी रोजी सकाळी ११ ते दुपारी २.३० वाजेपर्यंत परिवहन विभागात अर्ज करावा. एकाच क्रमांकाकरीता एकापेक्षा जास्त अर्ज असल्यास त्याची यादी २४ फेब्रुवारी रोजी सकाळी १०.३० वा. कार्यालयाच्या सूचना फलकावर प्रसिद्ध करण्यात येणार आहे. या अर्जांसाठी त्याच दिवशी दुपारी ४.३० वाजता परिवहन विभागात लिलाव करण्यात येईल.
अर्ज कार्यालयाच्या खासगी वाहन नोंदणी विभागात धनाकर्ष (डीडी), पत्त्याचा पुरावा, आधारकार्ड, ओळखपत्र, पॅनकार्डच्या साक्षांकित प्रतीसह आधारकार्डला लिंक असलेल्या मोबाईल क्रमांकासह जमा करावा. हा डीडी ‘आर.टी.ओ.,पुणे’ यांच्या नावे राष्ट्रीयकृत, अनूसचित बँकेचा पुणे येथील असावा.
एकदा राखून ठेवलेला नोंदणी क्रमांक बदलून देता येणार नाही. नोंदणी क्रमांक राखून ठेवलेल्या दिनांकापासून ३० दिवसांच्या आत नोंदणीसाठी वाहन सादर केले नाही तर राखून ठेवलेला नोंदणी क्रमांक आपोआप रद्द होईल व शुल्क सरकारजमा होईल. कोणताही विशिष्ट नोंदणी क्रमांक राखीव ठेवण्यासाठी प्रदान केलेले शुल्क परत करता येणार नाही, असे प्रादेशिक परिवहन अधिकारी, पुणे यांनी कळविले आहे.
