पुण्याचे पोलीस आयुक्त अमिताभ गुप्ता यांच्या हस्ते होणार माध्यान्ह आरती
पुणे : बुधवार पेठेतील कै. श्रीमती लक्ष्मीबाई दगडूशेठ हलवाई दत्तमंदिर ट्रस्टचा शतकोत्तर रौप्यमहोत्सवी (१२५) गुरुपौर्णिमा उत्सव बुधवार दिनांक १३ जुलै रोजी साजरा होणार आहे. दिवसभर विविध धार्मिक कार्यक्रमांचे आयोजन करण्यात आले असून मंदिराला आकर्षक पुष्परचना व विद्युतरोषणाई देखील करण्यात आली आहे, अशी माहिती ट्रस्टचे अध्यक्ष अॅड.प्रताप परदेशी यांनी दिली.
दत्तमंदिर ट्रस्टचे कार्यकारी विश्वस्त अॅड.शिवराज कदम जहागिरदार, खजिनदार महेंद्र पिसाळ, उत्सवप्रमुख अॅड.रजनी उकरंडे, उत्सव उपप्रमुख युवराज गाडवे, विश्वस्त सुनिल रुकारी, डॉ.पराग काळकर, राजू बलकवडे, अक्षय हलवाई यांनी उत्सवाचे आयोजन केले आहे. बुधवारी पहाटे ५.३० वाजता हलवाई कुटुंबियांच्या हस्ते लघुरुद्र होणार आहे. सकाळी ६.३० वाजता पुणे मनपा माजी सभागृह नेते श्रीनाथ व वंदना भिमाले यांच्या हस्ते श्री दत्तयाग संपन्न होईल. त्यानंतर सकाळी ८ वाजता जिल्हा तथा सत्र न्यायाधिश उमा व संजय जुगलकिशोर भारुका यांच्या हस्ते प्रात:आरती होईल.
अॅड.शिवराज कदम जहागिरदार म्हणाले, गुरुपौर्णिमा उत्सवाची माध्यान्ह आरती पुण्याचे पोलीस आयुक्त अमिताभ गुप्ता यांच्या हस्ते होणार आहे. तर, सायं आरती सहपोलीस आयुक्त संदीप कर्णिक, अप्पर पोलीस आयुक्त (गुन्हे) रामनाथ पोकळे, अप्पर पोलीस आयुक्त (प्रशासन) डॉ. जालिंदर सुपेकर यांच्या हस्ते होणार आहे. सकाळी ७ ते दुपारी ४ यावेळेत मंदिरासमोरील श्री दत्त कला मंच उत्सव मंडपात भाविकांना स्वहस्ते अभिषेक देखील करता येणार आहेत.
गुरुपौर्णिमेनिमित्त बेलबाग चौकापासून मंदिरापर्यंत दुतर्फा श्री दत्त महाराजांचे चार अवतार असलेले श्रीपाद श्रीवल्लभ, नृसिंह सरस्वती, माणिकप्रभू, अक्कलकोट स्वामी समर्थ व संत परंपरेतील श्री वासुदेवानंद सरस्वस्ती टेंबे स्वामी, माधवनाथ महाराज, गजानन महाराज, साईबाबा, शंकरमहाराज, गोंदवलेकर महाराज, नाना महाराज तराणेकर तसेच श्री महादेवांसह श्री दत्त महाराज व क्रमाने सर्व नवनाथांच्या लावलेल्या आकर्षक तसबिरी हे खास वैशिष्टय आहे. तरी भाविकांनी उत्सवात सहभागी व्हावे, असे आवाहन ट्रस्टतर्फे करण्यात आले आहे.
