कोरोनाच्या खास सभेबाबत आळीमिळी..गप ..कशी ?

पुणे-कोरोना काळात तातडीची कामे म्हणून६७ (३) क या नियमाखाली करण्यात आलेल्या विविध कामांवर आणि खरेदींवर चर्चा करण्यासाठी खास सभा बोलावण्याची घोषणा करण्यात आली होती. मात्र ती हवेतच विरल्याचे पहायला मिळाले. वारंवार खास सभा घेण्याचे आश्वासन देणारे सत्ताधारी आणि वारंवार चर्चा करण्याची मागणी करणारे विरोधक अशा दोघांनाही कोरोनाच्या खास सभेचा विसर कसा पडला प्रश्न आता उपस्थित होतो आहे .कोरोनाच्या पहिल्या आणि दुसर्‍या लाटेमध्ये शहरात मोठ्या प्रमाणात रुग्ण आढळून आले होते. त्यामुळे महापालिका प्रशासनाने आयुक्तांच्या अधिकारात६७ (३) क या नियमाखाली तातडीची कामे म्हणून विविध कामे व विविध साधन सामुग्रींची खरेदी केली. कोरोनाच्या दोन वर्षांच्या काळात कोटेशन व निविदांच्या माध्यमातून कोट्यवधी रुपये खर्च करण्यात आले आहे. या काळात सीएसआरच्या माध्यमातूनही कोट्यवधींची खरेदी व कामे करण्यात आली.रुग्णालय व कोवीड केअर सेंटरसाठी लागणारे साहित्य, औषधे, रुग्णांसाठी कपडे, फर्निचर, ऑक्सीजन निर्मितीसाठी प्रकल्प, जेवण, अशा विविध प्रकारच्या कामांना व निविदांना स्थायी समितीने मुख्य सभा मंजुरी देईल, या भरवशावर मान्यता दिली. स्थायीच्या मान्यतेनंतर कोट्यावधींची खरेदी व कामे करण्यात आली. यामध्ये गैरव्यवहार झाल्याचा आरोप सत्ताधारी व विरोधकांनीही अनेकवेळा मुख्यसभेत केला. तसेच यासंदर्भात सभागृहात माहिती देण्याची मागणीही केली. यावर प्रत्येकवेळी कोरोनावर खास सभा घेण्याचे व त्यात सविस्तर माहिती देण्याचे आश्वासन सत्ताधार्‍यांनी दिले.परंतु नंतर मात्र काहीही झाले नाही आणि कोणी काहीही तक्रार केली नाही.