पुणे : “क्रांतिलेखक वि. श्री. जोशी यांचे लेखन अभ्यासकपूर्वक आणि ललित शैलीतील होते. सर्वसामान्यांना समजेल आणि वाचता येईल, अशा स्वरूपातील ही सगळी ग्रंथसंपदा आहे. क्रांतिकारकांच्या कार्यावरील ग्रंथाचे हे प्रदर्शन इतिहासाचे स्मरण करून देणारे आहे. या इतिहासाचे संवर्धन होणे गरजेचे आहे. मात्र, अलीकडच्या काळात लोकांनी इतिहासाकडे दुर्लक्ष केले आहे. स्वातंत्र्याची प्रेरणा सर्वांपर्यंत पोचवण्यासाठी शाळा-महाविद्यालयातील विद्यार्थ्यांना या ग्रंथसंपदेचा परिचय व्हायला हवा,” असे प्रतिपादन डॉ. न. म. जोशी यांनी केले.
स्वातंत्र्यवीर सावरकर राष्ट्रीय स्मारक, दादर (मुंबई), पुणे मराठी ग्रंथालय, इतिहास प्रेमी मंडळ व स्वानंद प्रतिष्ठान यांच्या संयुक्त विद्यमाने थोर क्रांतीलेखक आणि क्रांतीकारकांचे चरित्रकार वि. श्री. जोशी यांच्या जन्मशताब्दी सोहळ्यानिमित्त भरविलेल्या क्रांतिकारांवरील ग्रंथाचे आणि छायाचित्रांचे प्रदर्शन भरविण्यात आले आहे. या प्रदर्शनाच्या उद्घाटन सोहळ्यावेळी डॉ. जोशी बोलत होते. प्रसंगी वि. श्री. जोशी यांचे पुत्र चंद्रशेखर जोशी, इतिहास प्रेमी मंडळाचे मोहन शेटे, सावरकर स्मारकाचे नितीन शास्त्री आदी उपस्थित होते. ८, ९, १० ऑगस्ट या तीन दिवशी हे प्रदर्शन भरविण्यात आले आहे.
