पुणे : “भारतीय उद्योगांना प्रोत्साहन देण्यासाठी ‘मेक इन इंडिया’ हा उपक्रम महत्वाचा आहे. केंद्र व राज्य सरकारकडून यासाठी विविध योजना राबविल्या जात आहेत. या योजना क्लायंटपर्यंत पोहोचविण्यात सनदी लेखापाल महत्वाची भूमिका बजावू शकतात. त्यामुळे आपल्या क्लायंटला त्याबद्दलचे मार्गदर्शन देऊन ‘मेक इन इंडिया’ साकारण्यासाठी ‘सीए’नी पुढाकार घ्यावा,” असे मत सीए भावेश ठक्कर यांनी व्यक्त केले.
दि इन्स्टिटय़ूट ऑफ चार्टर्ड अकाऊंटंट ऑफ इंडियातर्फे (आयसीएआय) ‘मेक इन इंडियामध्ये सीएची भूमिका’ या विषयावर एमएसएमई परिषदेत भावेश ठक्कर बोलत होते. बिबवेवाडी येथील आयसीएआय भवन येथे झालेल्या चर्चासत्रावेळी सीए जुल्फेश शाह, सीए माहेश्वर मराठे आणि सीए कुसाई गोवावाला यांनी मार्गदर्शन केले. प्रसंगी आयसीएआयच्या केंद्रीय समितीचे सदस्य सीए चंद्रशेखर चितळे, विभागीय समितीचे सदस्य सीए आनंद जाखोटिया, पुणे शाखेच्या अध्यक्षा सीए ऋता चितळे, सचिव समीर लड्ढा, उपाध्यक्ष सीए अभिषेक धामणे, खजिनदार सीए काशिनाथ पाठारे आदी उपस्थित होते.
सीए भावेश ठक्कर म्हणाले, “पंतप्रधान नरेंद्र मोदी यांनी उद्योजकता वाढीसाठी मेक इन इंडिया, स्टार्टअप इंडिया, स्टॅन्ड अप इंडिया असे अनेक उपक्रम आणले आहेत. अर्थव्यवस्थेला उद्योग क्षेत्राच्या विकासामुळे गती मिळत असते. त्यामुळे उद्योगांना सक्षम करण्यासाठी मेक इन इंडिया उपयुक्त आहे. त्याच्या योग्य अंमलबजावणीसाठी सीएनी महत्वाची भूमिका बजावावी.”
सीए जुल्फेश शहा यांनी महाराष्ट्राच्या औद्योगिक व महिला उद्योग धोरणाविषयी विवेचन केले. सीए माहेश्वर मराठे यांनी एमएसएमई नोंदणीचे फायदे, तर सीए कुसाई गोवावाला यांनी अकाउंटिंग टॅक्स ट्रीटमेंटवर मार्गदर्शन केले. चंद्रशेखर चितळे, आनंद जाखोटिया, ऋता चितळे यांनीही आपले मत मांडले. समीर लड्ढा यांनी प्रास्ताविक केले. अभिषेक धामणे यांनी आभार मानले.
