पुणे : आपल्या उद्योगाला जागतिक स्तरावर घेऊन जाण्यासाठी, तसेच आंतरराष्ट्रीय बाजारपेठेत उद्योगाला स्थान मिळवून देण्यासाठी ग्लोबल इंडिया बिझनेस फोरमचे (जीआयबीएफ) व्यासपीठ उभारण्यात आले आहे. ‘जीआयबीएफ’मध्ये अनेक देशांचे दूतावास, उद्योग मंत्रालय आणि विविध देशांतील उद्योजक जोडले जात आहेत. उद्योगांच्या जागतिक विस्तारासाठी हे व्यासपीठ उपयुक्त ठरणार आहे. उद्योजकांनी जागतिक बाजारपेठेत आपला उद्योग नेण्यास प्रोत्साहन देण्यासाठी फोरमच्या वतीने येत्या ११ मे २०१९ रोजी उल्लेखनीय कामगिरी करणाऱ्या उद्योजकांना सन्मानित करण्यात येणार आहे, अशी माहिती ‘जीआयबीएफ’चे आंतरराष्ट्रीय अध्यक्ष डॉ. जितेंद्र जोशी यांनी पत्रकार परिषदेत दिली. डेक्कन येथील पीवायसी जिमखाना येथे झालेल्या पत्रकार परिषदेवेळी वर्ल्ड ट्रेंड सेंटरचे कॉर्डीनेटर निखिल ओसवाल, ‘जीआयबीएफ’चे आंतरराष्ट्रीय समन्वयक दीपाली गडकरी, जीआयबीएफचे सहसचिव धीरेंद्र आपटे, युवा समन्वयक अभिषेक जोशी आदी उपस्थित होते.
डॉ. जितेंद्र जोशी म्हणाले, “भारत हा वेगाने विकसित होणारा आणि जागतिक महासत्ता होण्याकडे वाटचाल करीत असलेला देश आहे. भारत सरकारने सुरु केलेल्या ‘मेक इन इंडिया’, ‘स्किल्स डेव्हलपमेंट’ यांसारख्या अभियानामुळे भारतासह विदेशी कंपन्यांना व्यवसायाच्या मोठ्या संधी उपल्बध झाल्या आहेत. अशावेळी जागतिक स्तरावर उद्योजकांना एक सामायिक व्यासपीठ असावे, या कल्पनेतून ‘जीआयबीएफ’ची स्थापना केली. या व्यासपीठाच्या माध्यमातून ऑटोमोबाइल, अभियांत्रिकी, केमिकल, फार्मास्युटिकल्स, इलेक्ट्रॉनिक्स, अवजड उद्योग, सेवा क्षेत्र अशा विविध व्यावसायिकांना जोडण्याचा प्रयत्न केला आहे. याला कोणत्याही धर्माचे, जातीचे किंवा प्रदेशाचे बंधन नाही. व्यवसाय करणारा कोणीही या फोरमचा सभासद होऊ शकेल. आज ‘जीआयबीएफ’चे ३७ देशांमध्ये कार्य सुरु असून, जवळपास ५३ हजार सभासद आहेत. जागतिक मुख्यालय दुबई येथे, मुख्य कार्यालय नवी दिल्ली येथे, तर कॉर्पोरेट कार्यालय पुण्यात आहे. एमडीएच मसाल्याचे चुनीलाल, दिल्लीचे मुख्यमंत्री अरविंद केजरीवाल, गायक बप्पी लहरी, संगणक शास्त्रज्ञ डॉ. विजय भटकर यांच्यासह इटली, मलेशिया, हंगेरी, बांगलादेश, ऑस्ट्रेलिया, अफगाणिस्तान, इथिओपिया, इराक आदी देशांचे दूतावास या फोरमचे मानद सभासद झाले आहेत. गेल्या वर्षभरात जीआयबीएफने आंतरराष्ट्रीय स्तरावर ८० कोटीची व्यावसायिक उलाढाल केली आहे.”
“जागतिक स्तरावरील उद्योजकांशी व्यावसायिक भागीदारी करण्याची संधी जीआयबीएफमुळे उपलब्ध होणार आहे. जागतिक स्तरावर उद्योगाला प्रोत्साहित करण्यासाठी राज्यस्तरीय, राष्ट्रीय आणि आंतरराष्ट्रीय स्तरावर ‘जीआयबीएफ पुरस्कार’ देऊन सन्मानित करण्यात येणार आहे. त्यातील पश्चिम विभागाच्या पुरस्कारांसाठी निवड समितीने २५ उद्योजकांनी निवड केली आहे. व्हर्लपूल, फिनोलेक्स, केसरी यासह इतर उद्योग समूहांना सन्मानित करण्यात येणार आहे. शनिवार, दि. ११ मे २०१९ रोजी सायंकाळी ७.०० वाजता पुण्यातील नगर रोडस्थित हॉटेल हयात येथे हा पुरस्कार वितरण सोहळा होणार आहे. इथिओपिया, अफगाणिस्तान आणि इंडोनेशिया दूतावासातील अधिकारी यांच्यासह लीला पुनावाला, झेलम चौबळ आदी या सोहळ्यासाठी प्रमुख पाहुणे म्हणून उपस्थित राहणार आहेत. याच दिवशी सकाळी ९.०० वाजता ‘ट्रेड बियॉन्ड वेस्ट’ या विषयावर चर्चासत्र होणार आहे. परी रोबोटिक्सचे मंगेश काळे, एचडीएफसीचे अजय सचदेव, कॉऊन्सल जनरल इंडोनेशिया आडे सुकेदार, कौन्सुल जनरल इथिओपिया डेमेक अंबुलू, कौन्सुल जनरल नदीम शरीफी या चर्चासत्रात सहभागी होणार आहेत. यावेळी उद्योजकांच्या यशोगाथा ऐकण्याची संधी मिळणार आहे,” असेही डॉ. जितेंद्र जोशी यांनी नमूद केले आहे.
निलेश ओस्वाल म्हणाले, “अनेक मोठ्या कंपन्या लहान कंपन्यांकडून सेवा घेतात. लघु व माध्यम स्वरूपाच्या कंपन्यांना जोडण्याचे काम जीआयबीएफ करत आहे. जागतिक स्तरावर व्यवसाय विस्तारासाठी जवळपास ३२९ शहरांसोबत जोडले गेलो आहोत. हे सर्व जीआयबीएममुळे साध्य झाले आहे. त्यामुळे अनेक कंपन्या विविध देशांमध्ये ग्लोबल एक्सचेंग, प्रोग्रेस होण्यास मदत होणार आहे. ३१ जुलै रोजी तैवान ट्रेड ऑर्गनिझशनचे २० मेम्बर पुण्यात येणार असून जीआयबीएफसोबत वन-टू-वन बिझनेस करार होणार आहे. जीआयबीएफच्या माध्यमातून ग्लोबल कनेक्ट निर्माण होणार असून, वर्ल्ड ट्रेड सेंटर व जीआयबीएफसोबत जोडल्याचा आनंद आहे.”
