ट्रिनिटी महाविद्यालयात दोन दिवसीय आंतरराष्ट्रीय परिषद
पुणे : “अपारंपारिक उर्जेच्या स्रोतांची उपलब्धी भारतात मोठ्या प्रमाणात आहे. आता वीजेवर चालणार्या गाड्या, अनेक सौर प्रकल्प येत आहेत. तंत्रज्ञानाचा योग्य वापर आणि उपयोजित संशोधन केले, तर सौर उर्जा, पवन उर्जा यांसारख्या अपारंपरिक उर्जा निर्मिती क्षेत्रात मोठ्या संधी उपलब्ध होतील,” असे प्रतिपादन इशा सोलरचे व्यवस्थापकीय संचालक डॉ. दीपक केळकर यांनी केले.
येवलेवाडी येथील केजे एज्युकेशनल इन्स्टिट्यूटच्या ट्रिनिटी अभियांत्रिकी आणि संशोधन महाविद्यालयाच्या यंत्र अभियांत्रिकी विभागाच्या वतीने सावित्रीबाई फुले पुणे विद्यापीठाच्या सहकार्याने ‘अपारंपरिक उर्जा’ या विषयावर आयोजित दोन दिवसीय आंतरराष्ट्रीय परिषदेत डॉ. केळकर बोलत होते. विप्रोचे सरव्यवस्थापक सतीश रानडे, डॉ. रश्मी वाळवेकर, केजे एज्युकेशनल इन्स्टिट्यूटचे संस्थापक कल्याण जाधव, कार्यकारी संचालक डॉ. हेमंत अभ्यंकर, संचालक (कॅम्पस) डॉ. व्यासराज काखंडकी, महाविद्यालयाचे प्राचार्य डॉ. हरिभाऊ फाकटकर, यंत्र अभियांत्रिकीचे विभागप्रमुख डॉ. भरत शिंदे आदी उपस्थित होते. या परिषदेत आंतराष्ट्रीय ख्यातीच्या तज्ज्ञांनी अपारंपारिक ऊर्जा क्षेत्रातील आधुनिक संशोधन व संधींविषयी मार्गदर्शन केले. उद्योग व शिक्षण क्षेत्रांत समन्वय साधण्याच्या उद्देशाने ही परिषद आयोजिली होती. दहाहून अधिक विविध देशातील संशोधकांनी आपले प्रबंध सादर केले. डॉ एस. ए. काळे यांनी यशस्वी संयोजन केले.
सतीश रानडे म्हणाले, “भारतामध्ये सौर उर्जा क्षेत्रात खूप काम करण्यासारखे आहे. आंतरशाखीय अभ्यासातून आणि संशोधनातून नाविन्यपूर्ण प्रकल्प उभारण्याची क्षमता या क्षेत्रात आहे. त्यामुळे विद्यार्थ्यांनी अशा संधींचे व्यवसायात रुपांतर करण्यावर भर दिला पाहिजे.” कल्याण जाधव म्हणाले, ‘उद्योग क्षेत्राला पूरक कौशल्ये आपण आत्मसात करावीत. नोकरी मागत फिरण्यापेक्षा नोकर्या निर्माण करण्याचा प्रयत्न आपण केला पाहिजे. स्वयंरोजगार उभारण्यासाठी केजे एज्युकेशनल इन्स्टिट्यूट कायम तुमच्या पाठिशी असेल.” डॉ. हेमंत अभ्यंकर, डॉ. व्यासराज काखंडकी यांनीही मार्गदर्शन केले. डॉ. भरत शिंदे यांनी प्रास्ताविक केले.
