डॉ. नरेंद्र जाधव, स्वामी ज्ञानवत्सल गुंफणार पहिले पुष्प
पुणे : दि इंटरनॅशनल असोसिएशन ऑफ लायन्स क्लब्स डिस्ट्रिक्ट 3234 डी 2, लायन्स इनोव्हेशन फोरम, आकुर्डी येथील सूर्या ग्रुप यांच्या संयुक्त विद्यमाने ’देणे लायनीझमचे-लेणे व्याख्यानमालेचे’ या लायन्स व्याख्यानमालेचे आयोजन करण्यात आले आहे. या व्याख्यानमालेत पहिल्या पुष्पाचे उद्घाटन ज्येष्ठ संपादक पत्रकार विजय कुवळेकर यांच्या हस्ते होणार आहे.
हा उद्घाटन सोहळा रविवार, दि. 20 जानेवारी 2019 रोजी सकाळी 9.30 वाजता कोथरूड येथील यशवंतराव चव्हाण नाट्यगृहात होणार आहे. व्याख्यानमालेच्या या पहिल्या पुष्पात केंद्रीय नियोजन आयोगाचे माजी सदस्य आणि सावित्रीबाई फुले पुणे विद्यापीठाचे माजी कुलगुरू खासदार डॉ. नरेंद्र जाधव व अहमदाबाद येथील अक्षरधाम, स्वामीनारायण मंदिर ट्रस्टचे परमपूज्य स्वामी ज्ञानवत्सल यांचे व्याख्यान होणार आहे.
डॉ. जाधव ’भारतीय अर्थव्यवस्था : आजची व उद्याची’ यावर, तर स्वामी ज्ञानवत्सल ’सुखाची परिभाषा आणि जीवनाची श्रीमंती’ या विषयावर मार्गदर्शन करणार आहेत.
लायन्स क्लबचे प्रांतपाल लायन्स रमेश शहा यांनी यावर्षी ’मिशन इनोव्हेशन’ या घोषणेद्वारे समाजहितासाठी अनेक नाविन्यपूर्ण सेवाप्रकल्प सादर केले असून, त्याला समाजाच्या सर्वच स्तरातून भरपूर प्रतिसाद मिळत आहे. ’लायन्स व्याख्यानमाला’ हा त्यातीलच एक महत्वपूर्ण प्रकल्प आहे. यापुढे प्रत्येक वर्षी ही लायन्स व्याख्यानमाला आयोजित केली जाणार आहे.
दि इन्स्टिट्यूट ऑफ चार्टर्ड अकाउंटंट्स ऑफ इंडिया पुणे शाखा, जितो पुणे व विश्वकर्मा विद्यापीठ या संस्था या उपक्रमासाठी सहयोगी आहेत. शारदोत्सवाचा उपक्रम असणारी ही व्याख्यानमाला सर्वांसाठी विनामूल्य खुली असणार आहे, अशी माहिती व्याख्यानमालेचे मुख्य संयोजक लायन प्रकाश नारके यांनी पत्रकार परिषदेत दिली. यावेळी लायन्स क्लबचे प्रांतपाल लायन रमेश शहा, लायन शरद पवार, लायन राजेंद्र गोयल, लायन दिलीप निकम, लायन शाम खंडेलवाल उपस्थित होते.
