मुंबई, दि. ११ मार्च: राज्यातील सर्व सरकारी वैद्यकीय महाविद्यालयातील अस्थायी सहाय्यक प्राध्यापकांचे जे. जे. रुग्णालयात साखळी उपोषण गेल्या दीड महिन्यांपासून सुरू आहे. कोविड काळात सेवा देऊनही संपाला बसलेल्या या सहायक प्राध्यापकांच्या सेवा नियमित करण्याबाबत वैद्यकीय शिक्षण विभागाने लवकरात लवकर दखल घ्यावी व यातून मार्ग काढावा अशी मागणी विधान परिषदेचे विरोधी पक्ष नेते प्रवीण दरेकर यांनी विधानपरिषदेत केली. सेवा नियमित करण्याबाबत लवकरच बैठक आयोजित करून अस्थायी वैद्यकीय प्राध्यापकांच्या सेवा नियमिततेबाबतचा प्रश्न मार्गी लावू असे आश्वासन वैद्यकीय शिक्षण मंत्री अमित देशमुख यांनी विधानपरिषेद यांनी दिले.
प्रश्नोत्तराच्या तासात यांसदर्भात प्रश्न उपस्थित करताना दरेकर यांनी सांगितले की, अस्थायी सहाय्यक प्राध्यापकांनी सेवा नियमित करण्यासोबतच विविध मागण्यांसाठी १७ जानेवारीपासून आंदोलन पुकारले आहे. या संदर्भात स्वतः वैद्यकीय शिक्षण मंत्री यांची भेट घेतली होती. दरम्यान वैद्यकीय शिक्षण विभागाने सहाय्यक प्राध्यापकांच्या सेवा नियमित करण्याबाबत आश्वासन दिले होते. मात्र, या आंदोलनाकडे वैद्यकीय शिक्षणमंत्री, सचिव, आयुक्त, तसेच संचालकांकडून दुर्लक्ष केले जात आहे. सरकारच्या वेळकाढू धोरणामुळे कोविड काळात सेवा दिली असताना गेल्या दीड महिन्यांपासून उपोषण करण्याची वेळ प्राध्यापकांवर आली आहे. आंदोलनाला दीड महिने झाले तरीही सरकार दरबारी त्याबाबत कोणतीही दखल घेत नसल्याने हे सरकारचे दुर्दैव असल्याची टीका दरेकर यांनी केली.
अस्थायी प्राध्यापकांच्या ८० टक्के मागण्या राज्य सरकार आणि वैद्यकीय शिक्षण विभागाने मान्य केल्या आहेत. उर्वरित मागण्यांबाबत वैद्यकीय शिक्षण विभागाने शिफारशीसह सामान्य प्रशासन विभाग आणि अर्थ व नियोजन विभागाला पत्रव्यवहार केला आहे. तिथून सहायक प्राध्यापकांच्या सेवा नियमित करण्याबाबत सर्वोच्च न्यायालय निकाल देणार असल्याचे समजते. त्यामुळे या प्रक्रियेत अडचणी आहेत. तरी, यासंदर्भात विधिमंडळाच्या काळात शक्य असल्यास बैठक बोलूवून जे. जे. रुग्णालयातील अस्थायी सहायक प्राध्यापकांच्या सेवा नियमित करण्याबाबतचा प्रश्न मार्गी लावणार असल्याचे वैद्यकीय शिक्षण मंत्री अमित देशमुख यांनी सांगितले.
