बेंगळुरू -आयपीएल 2022 चा मेगा लिलाव बेंगळुरूमध्ये सुरू आहे. 10 बोली लावणाऱ्या फ्रँचायझींनी आतापर्यंत 38 खेळाडूंना खरेदी केले आहे. त्यापैकी आतापर्यंतचा सर्वात महागडा खेळाडू इशान किशन ठरला आहे. त्याला मुंबईने 15.25 कोटींना विकत घेतले. ईशानवर बोली लावण्यासाठी नीता अंबानी यांच्या मुंबई आणि गुजरातदरम्यान 10 मिनिटांची शर्यत सुरु होती. त्यानंतर, निकोलस पूरनसाठी दुसरी सर्वात मोठी स्पर्धा झाली. पूरनला हैदराबादने 10.75 कोटींना विकत घेतले.
या लिलावासह ईशान आयपीएलमधील दुसरा सर्वात महागडा भारतीय खेळाडू ठरला आहे. यापूर्वी युवराजला दिल्ली कॅपिटल्सने 16 कोटींना विकत घेतले होते. इशानने त्याचा गुरू महेंद्रसिंग धोनीलाही मागे टाकले, ज्याला चेन्नईने १२ कोटींमध्ये कायम ठेवले आहे.
ईशाननंतरचा दुसरा सर्वात महागडा खेळाडू दीपक चहर ठरला आहे. त्याला चेन्नई सुपर किंग्जने 14 कोटींना विकत घेतले. मधल्या फळीतील फलंदाज आणि यष्टिरक्षक निकोलस पूरन यांच्यातही दीर्घ लढत होती. सुमारे 8 मिनिटांच्या बोलीनंतर पुरनला हैदराबादने 10.75 कोटींना विकत घेतले.
या लिलावात इशान व्यतिरिक्त श्रेयस अय्यर, हर्षल पटेल आणि श्रीलंकेचा हसरंगा 10 कोटींहून अधिक रुपयांना विकले गेले. 10 कोटींहून अधिक किमतीत विकला जाणारा हसरंगा हा पहिला परदेशी खेळाडू आहे.
या लिलावात यंगिस्तानवरही पैशांचा पाऊस पडला. युवा सलामीवीर देवदत्त पडिक्कलला बेंगळुरूने ७.७५ कोटींना विकत घेतले. पडिक्कलची 2 कोटी बेस प्राईसची बोली 40 सेकंदात 4 कोटी पार गेली होती. त्याचप्रमाणे हर्षल पटेलला राजस्थान रॉयल्सने 10.75 कोटींना खरेदी केले. गेल्या वर्षी त्याची सॅलरी 20 लाख होती म्हणजेच यामध्ये 53 पट वाढ झाली आहे. केकेआरने नितीश राणाला 8 कोटींना विकत घेतले.
ऑक्शनच्या चकित करणाऱ्या गोष्टी
मोठी नावे विकली गेली नाहीत: बांगलादेशचा माजी कर्णधार शकीब अल हसनही पहिल्या फेरीत विकला गेला नाही. त्याची मूळ किंमत २ कोटी रुपये होती. मिस्टर आयपीएल म्हणून प्रसिद्ध असलेला सुरेश रैना विकला गेला नाही. त्याची मूळ किंमत २ कोटी रुपये होती. आयपीएल 2021 च्या मधल्या हंगामात चेन्नईने त्याला वगळले होते. आयपीएलमध्ये राजस्थान रॉयल्सचा कर्णधार असलेला स्टीव्ह स्मिथही विकला गेला नाही. त्याची मूळ किंमतही २ कोटी रुपये होती. गेल्या वर्षी स्मिथ दिल्ली कॅपिटल्स संघाचा भाग होता.
