शरद क्रीडा आणि सांस्कृतिक प्रतिष्ठान आयोजित भजन-अभंग स्पर्धेत सातारा कारागृहात निनादला टाळ-मृदंगाचा गजर

बंदिजनांच्या सादरीकणाने भक्तीरसाची अनुभूती
पुणे – कारागृहाचे आवार असले तरी सर्वदूर पसरलेली आमराई आणि टाळ, मृदंगाच्या ठेक्यावर बंदीजनांनी सादर केलेल्या संतरचनांनी भक्तीरसाची अनुभूती आली.
शरद क्रीडा व सांस्कृतिक प्रतिष्ठानतर्फे देशाच्या स्वातंत्र्याचा अमृतमहोत्सव आणि संस्थेच्या रौप्यमहोत्सवाचे निमित्त साधून कारागृहातील बंदिजनांसाठी जगद्गुरू श्री संत तुकाराम महाराज राज्यस्तरीय अभंग व भजन स्पर्धाचे आयोजन करण्यात आले आहे. आज सातारा कारागृहातील बंदीजनांनी आपले सादरीकरण केले.
‘जय जय राम कृष्ण हरि’, ‘अलंकापुरी..’, ‘अंजनीच्या सुता’ या संत रचनांबरोबरच स्वरचित ‘विठ्ठलाची मूर्ती आली भिमा तिरी’ ही रचना मोठ्या भक्तीभावाने सादर केली. वयाची 80 वर्षे पार केलेल्या एका आजोबांच्या सादरीकरणाने सर्वांचे लक्ष वेधून घेतले. कारागृहात आणखी एक वेगळेपण जाणवले ते म्हणजे बंदिजन आणि तुरुंग अधिकार्‍यांचे जिव्हाळ्याचे नाते. या नात्यातूनच कलाकारांमधील कलागुणांना वाव मिळाल्याचे दिसून आले.
कारागृह अधीक्षक ज्ञानेश्वर दुबे, प्रशासन अधिकारी आर. टी. भापकर, शरद क्रीडा आणि सांस्कृतिक प्रतिष्ठानचे अध्यक्ष आणि स्पर्धा प्रमुख लक्ष्मीकांत खाबिया, उपाध्यक्ष नंदकुमार बंड, हभप अच्युत महाराज कुलकर्णी, विश्वस्त विवेक थिटे, संजीव मिसाळ, शंकर धुमाळ, प्रतिष्ठानच्या सातारा शाखा प्रमुख क्रांती पाटील, सीमा जाधव आदी उपस्थित होते.
स्पर्धेच्या माध्यमातून सद्मार्ग दाखविला
बंदिजन हा समाजातील दुर्लक्षित घटक समजला जातो. अशा व्यक्तींसाठी कुणीतरी पुढे येऊन काम करणे अपेक्षित असते. शरद क्रीडा आणि सांस्कृतिक प्रतिष्ठानने एक आगळावेगळा उपक्रम राबवून सामाजिक बांधिलकी जपली आहे, याचे कौतुक वाटते. भजनाचे साहित्य, जीवनाला आकार देऊ शकेल असे संतसाहित्य, तुकोबारायांचा अभंग असलेली लक्षवेधी फ्रेम यामुळे बंदिजनांच्या आयुष्याला निश्चितच चांगला मार्ग मिळू शकेल.
ज्ञानेश्वर दुबे, कारागृह अधीक्षक

स्पर्धेेमुळे वारीची सुरुवात
80 वर्षांपेक्षा जास्त असलेले एक आजोबा बंदिवासात आहेत. तेही स्पर्धेत सहभागी झाले होते. वारीला नियमित जात होते. पण सध्या बंदिवासात असल्याने त्यांना पंढरीची वारी करता येत नव्हती. भजन-अभंग स्पर्धेमुळे वारीला सुरुवात झाली असेच वाटते आहे, असे त्यांनी भावविवशतेने सांगितले.

महाअंतिम फेरीत प्रथम क्रमांक पटकाविणार्‍या संघास ज्ञानोबा-तुकाराम महाकरंडक आणि प्रमाणपत्र, द्वितीय क्रमांकास राष्ट्रसंत तुकडोजी महाराज महाकरंडक आणि प्रमाणपत्र तर तृतीय क्रमांकास संत शेख महंमद महाकरंडक आणि प्रमाणपत्र देण्यात येणार आहे. स्पर्धकांना आणि स्पर्धक संघांना सहभाग प्रमाणपत्र देण्यात येणार आहे.
स्व. सौ. कमलाबाई रसिकलाल धारीवाल यांच्या स्मरणार्थ संघांना साहित्यभेट
स्पर्धेत सहभागी झाल्याबद्दल कारागृहातील संघांला सौ. दिना आणि प्रकाश धारीवाल यांच्या वतीने स्व. सौ. कमलाबाई रसिकलाल धारीवाल यांच्या स्मरणार्थ हार्मोनियम, तबला, पखवाज, 10 जोडी टाळ, तुकोबांच्या अभंगाची पाच फूट बाय पाच फूट आकाराची फे्रम व प्रबोधनात्मक तसेच प्रेरणायादी 82 पुस्तकांचा संच देण्यात आला.