पुणे-ब्राम्हण महासंघानं पुण्यातील राष्ट्रवादी काँग्रेसच्या मुख्य कार्यालयाबाहेर राष्ट्रवादी काँग्रेसेचे नेते अमोल मिटकरी यांनी केलेल्या एका भाषणाविरोधात आंदोलन केले आहे. यावेळी महासंघाचे प्रमुख अनिल दवे यांनी आपल्या सहकाऱ्यांंसह मिटकरींविरोधात घोषणाबाजी केली. यावेळी राष्ट्रवादी काँग्रेसचे कार्यकर्तेही आक्रमक झाल्याचे पाहायला मिळाले. यावर अमोल मिटकरी यांची प्रतिक्रिया घेतील असता मी कोणत्याही समाजाचा उल्लेख केला नाही, भाषणात मी अपशब्द वापरले नाही. हे कटकारस्थान सुरू आहे, असे मिटकरी म्हणाले.
राष्ट्रवादीच्या कार्यालयासमोर येऊन ब्राम्हण महासंघाच्या काही कार्यकर्त्यांनी मंत्रोच्चार करत अमोल मिटकरी हाय हाय अशी घोषणाबाजी सुरु करताच राष्ट्रवादीच्या कार्यकर्त्यांनी घोषणाबाजी सुरु केली , घोषणा देताना दोन्ही बाजूचे कार्यकर्ते एकमेकांना धक्काबुक्की करत घोषणा देऊ लागताच पोलिसांनी हस्तक्षेप करत दोनही गटांना एकमेकांपासून दूर करण्याचा प्रयत्न केला .
भाषणात नेमकं काय म्हणाले?
अमोल मिटकरी यांनी सांगलीत सभेत बोलताना पुरोहितांच्या मंत्रोच्चाराची खिल्ली उडवली होती. आम्हा बहुजनाच्या पोरांना काही समजू देत नाही, एका लग्नात गेलो होतो. तिथे नवरदेव पीएचडी आणि नवरी एमए झालेली होती. यावेळी ब्राह्मणाने एक मंत्र म्हटला ज्याचा अर्थ मी त्या नवरदेवाच्या कानात सांगितला की, महाराज म्हणताय माझी पत्नी घेऊन जा. यावेळी राष्ट्रवादीचे प्रदेशाध्यक्ष आणि जलसंपदा मंत्री स्टेजवर उपस्थित होते. त्यांनाही यानंतर हसू आवरता आले नव्हते. यामुळे राज्यभरात पुरोहित संघटना संतप्त झाल्या असून आमदार अमोल मिटकरींवर टीका करत आहेत. मिटकरी यांनी केलेले ब्राह्मण समाजाविषयी केलेल्या वक्तव्याच्या निषेधार्थ पुण्यात ब्राह्मण महासभेतर्फे आंदोलन करण्यात येत आहे.राज्यात राष्ट्रवादीची हीच भूमिका आहे का? असा प्रश्न परशुराम सेवा संघाचे प्रदेश अध्यक्ष विश्वजीत देशपांडे यांनी उपस्थित केला आहे. यावेळी राज्याचे सामाजिक न्यायमंत्री धनंजय मुंडेंही तिथे उपस्थित होते. मात्र त्यांनी यावर आक्षेप घेतला नाही, हाच त्याचा सामाजिक न्याय आहे का? असा सवाल यावेळी देशपांडे यांनी उपस्थित केला आहे.
