मुंबई: राष्ट्रवादी काँग्रेसचे ज्येष्ठ नेते आणि माजी उपमुख्यमंत्री छगन भुजबळ शिवनेनेत जाणार या वृत्ताचा खुद्द भुजबळ यांनी स्पष्ट शब्दात इन्कार केला आहे. आपण शिवबंधन बांधून घेणार नसून आपल्या मनगटावर घड्याळच राहील असे सांगत शिवसेना प्रवेशाची चर्चा ही निव्वळ अफवा असल्याचे भुजबळ यांनी स्पष्ट केले आहे.अनेक वृत्तवाहिन्यांनी सूत्रांच्या हवाल्याने हे वृत्त आज सकाळपासून प्रसारित करण्यास सुरुवात केली. मात्र भुजबळांनी हे वृत्त अफवा असल्याचे म्हणत या चर्चेला पूर्णविराम दिला.
आज ११ वाजता गुजरातसह समुद्रात वाहून जाणारे पाणी गोदावरी खोऱ्यात वळविणाऱ्या राज्यातील पहिल्या प्रकल्पाचे उद्घाटन नाशिक जिल्ह्यातील दिंडोरी तालुक्यातील देवसाने येथे माझ्याच हस्ते होत आहे. आपण या कार्यक्रमात गुंतलेलो असून माझ्या शिवसेना प्रवेशाबाबतच्या चर्चेच काहीएक तथ्य नाही असे भुजबळ प्रसारमाध्यमांशी बोलताना म्हणाले.
