माहिती कसली घेताय, प्रवीण दरेकरांनी मुख्यमंत्री शिंदेंनाच सुनावले; उपसभापतींनी दरेकरांना दिली समज

नागपूर: आमदार प्रसाद लाड यांनी विचारलेल्या एका प्रश्नावर माहिती घेऊन सांगतो असे मुख्यमंत्री एकनाथ शिंदे यांनी सांगताच ‘अरे माहिती कसली घेताय?’, असे म्हणत भाजपचे सदस्य प्रवीण दरेकरांनी थेट मुख्यमंत्री एकनाथ शिंदे यांना सुनावले. मुख्यमंत्री बोलत असताना त्यांना बोलू न देता गोंधळ घालण्यास सुरुवात केल्याबाबत उपसभापती निलम गोऱ्हे यांनी दरेकरांना ‘मुख्यमंत्र्यांनाही तुम्ही बोलू देत नाही. तुम्ही विरोधी पक्षात आहात का..?असा प्रश्न केला .परळ येथील गांधी रुग्णालयातील कर्मचाऱ्यांच्या ग्रॅच्युटीचा प्रश्न केंद्र सरकारकडे प्रलंबित आहे. त्यासाठी राज्य शासन पाठपुरावा करणार का, असा प्रश्न सदस्य प्रसाद लाड आणि प्रवीण दरेकर यांनी केला. याची माहिती घेतली जाईल, असे मुख्यमंत्री शिंदे यांनी सांगितले. त्यावर आमदार दरेकर अचानक आक्रमक झाले. दोनशे कोटींचा हा घोटाळा आहे. माहिती कसली घेता, असा सवाल आमदार दरेकर यांनी केला. यावर ‘मुख्यमंत्र्यांनाही तुम्ही बोलू देत नाही. तुम्ही विरोधी पक्षात आहात का..? असे सभापती निलम गोऱ्हे यांनी आमदार दरेकर यांना सुनावले.भगवती व डॉ. बाबासाहेब आंबेडकर रुग्णालयाची दुरवस्था झाली आहे. याठिकाणी अत्याधुनिक सुविधा नाहीत. मुंबई उपनगरातील ही महत्त्वाची रुग्णालये असून वसई, विरार येथून येथे नागरिक उपचारासाठी येतात. सुविधांच्या अभावी रुग्णांना केईएम किंवा नायर रुग्णालयात जावे लागते, असा मुद्दा या प्रश्नाद्वारे उपस्थित करण्या आला होता. त्यावर मुख्यमंत्री शिंदे म्हणाले, मुंबईतील महापालिकेच्या रुग्णालयांच्या दुरवस्थेबाबत विधानसभेतही चर्चा झाली आहे. पालिकेच्या रुग्णालयांसाठी निधी उपलब्ध केला जाईल, असे जाहीर केले आहे. परंतु, आमदार दरेकर यांनी भगवती व डॉ. बाबासाहेब आंबेडकर रुग्णालयाबाबत मुद्दा मांडल्याने त्यासाठी आजच पालिका आयुक्त इक्बाल सिंह चहल यांना सूचना दिल्या जातील. या रुग्णालयांच्या सुधारणेसाठी दोन महिन्याचे नियोजन केले जाईल व निधी दिला जाईल, असे मुख्यमंत्र्यांनी स्पष्ट केले.