पुणे-जलसंपदा विभागाचे मुख्य अभियंता ता. ना. मुंडे यांची राज्य सरकारने औरंगाबाद येथे बदली केली असून, त्यांच्याजागी जल व सिंचन विभागाचे मुख्य लेखापरीक्षक राजेंद्रकुमार मोहिते यांची नियुक्ती करण्यात आली आहे. पाण्यावरून जलसंपदा विभाग आणि पुणे महापालिका यांच्यात सुरू असलेल्या वादात मुंडे यांनी घेतलेल्या भूमिकेमुळे त्यांची बदली करण्यात आल्याची चर्चा आहे.
मुंडे यांची मोहिते यांच्या जागेवर बदली करण्यात आली असून, या ठिकाणी तत्काळ हजर राहण्याचे आदेश राज्य सरकारने दिले आहेत. राज्य सरकारने मंगळवारी याबाबतचा अध्यादेश काढला आहे. मुंडे यांनी महाराष्ट्र जलसंपत्ती नियमन प्राधिकरणाच्या आदेशाचा आधार घेऊन पुणे महापालिकेला ८.१६ अब्ज घनफूट (टीएमसी) पाणी घ्यावे लागेल, अशी भूमिका घेतली होती. त्यावरून जलसंपदा आणि पुणे महापालिका यांच्यात वाद उफाळून आला होता. ही कोंडी फोडण्यासाठी राज्य सरकारने अखेर मुंडे यांची बदली करण्याचा मार्ग स्वीकारला आहे.
राज्य सरकारने बदली झालेल्या संबंधित अधिकाऱ्यांबाबत आदेशात सूचना केल्या आहेत. त्यानुसार सरकारच्या पूर्वपरवानगीशिवाय कोणत्याही कारणास्तव रजा मंजूर करू नये. मूळ कार्यालयाने बदली झालेल्या अधिकाऱ्याचे कोणत्याही प्रकारचे अर्ज स्वीकारू नयेत. असे अर्ज प्राप्त झाल्यास ते संबंधित अधिकाऱ्यास मूळ पत्त्यावर परत करावेत. बदली झालेल्या अधिकाऱ्याने रजेचे अर्ज पाठविल्यास त्या अर्जाची दखल घेण्यात येणार नसल्याचे आदेशात स्पष्ट केले आहे.
या बदलीच्या विरोधात कोणत्याही प्रकारचा दबाव आणून बदली रद्द करण्याचा प्रयत्न झाल्यास ही कृती महाराष्ट्र नागरी सेवा (वर्तणूक) नियमाचे उल्लंघन करणारी असल्याने ती गैरवर्तणूक समजून त्यांच्याविरुद्ध शिस्तभंगाची कारवाई करण्यात येईल, असेही राज्य सरकारने आदेशात म्हटले आहे.
