तुळशीबागेत हनुमान जयंती सोहळा थाटात साजरा

• श्री रामजी संस्थान तुळशीबाग च्यावतीने आयोजन ; कीर्तनकार ज्ञानेश्वरबुवा कपलाने यांचे हनुमान जन्माचे कीर्तन.

पुणे :नाम मारुतीचे घ्यावे…पुढे पाऊल टाकावे…अशा शब्दांत हनुमानाच्या चरित्राचे वर्णन करीत हनुमान जन्माचे कीर्तन पेशवेकालीन तुळशीबाग राममंदिरात पार पडले. राम-लक्ष्मण-सीतेच्या मूर्तीसमोर असलेल्या पाषाणातील उभ्या हनुमानाच्या मूर्तीला हनुमान जयंतीनिमित्त रेशमी वस्त्रे व दागिने घालण्यात आले होते. तर, मंदिरावर आकर्षक फुलांची व झुंबरांची सजावट देखील करण्यात आली.

श्री रामजी संस्थान तुळशीबाग च्यावतीने श्रीराम जन्मोत्सवानिमित्त तुळशीबाग येथील राम मंदिरात विविध कार्यक्रमांचे आयोजन करण्यात आले होते. त्याची सांगता हनुमान जयंतीच्या दिवशी झाली. यावेळी संस्थानचे कार्यकारी विश्वस्त रामदास तुळशीबागवाले, उद्धव तुळशीबागवाले, भरत तुळशीबागवाले, राघवेंद्र तुळशीबागवाले, श्रीपाद तुळशीबागवाले, शिशिर तुळशीबागवाले, कोटेश्वर तुळशीबागवाले यांसह तुळशीबागवाले परिवार उपस्थित होता. रामनवमी उत्सवाचे यंदा २६१ वे वर्ष आहे.

हनुमान जयंतीच्या दिवशी सकाळी ब्रह्मवृंदाकडून श्रीहनुमंतास रुद्राभिषेक व सकाळी ६.३० वाजता ह.भ.प.ज्ञानेश्वरबुवा कपलाने यांचे श्रीहनुमान जन्माचे कीर्तन झाले. याशिवाय श्रीराम जन्मोत्सव सोहळ्यात विद्यावाचस्पती शंकर अभ्यंकर यांची प्रवचनमाला, लळीत व पायघडीचे कीर्तन आणि समस्त तुळशीबागवाले परिवाराकडून श्रीरामराज्याभिषेक सोहळा देखील पार पडला. उत्सवादरम्यान पं.रघुनंदन पणशीकर, गायिका सावनी दातार व शिल्पा पुणतांबेकर, संपदा वाळवेकर व सहका-यांचे गायन, आनंद भीमसेन जोशी, प्रख्यात गायक आनंद भाटे, चैत्राली अभ्यंकर गायनाचा कार्यक्रम तसेच हिमांशु बक्षी यांचा बासरीवादनाचा कार्यक्रम देखील पार पडला. याशिवाय धार्मिक कार्यक्रमांचे देखील आयोजन करण्यात आले होते.