सिरीयल किलरला जायबंदी करणाऱ्या बार्शीच्या शिरीष पवारांचा गौरव!

रायगडातील खोपोलीचे वरिष्ठ पोलीस निरीक्षक शिरीष पवार यांचा राष्ट्रपती पदकाने सन्मान.
सोलापूर जिल्ह्यातील बार्शी तालुक्यातील आगळगाव येथील शिक्षक कृष्णात पवार यांचा मुलगा शिरीष मोठ्या जिद्दीने कृषी पदवीचे शिक्षण घेण्यासाठी कोल्हापूरला जातो. जीवनात काही तरी घडवून दाखविण्याचे स्वप्न घेवून कृषी पदवीचे शिक्षण घेत असताना जिवाभावाच्या मित्रांचे प्रचंड मोठे जाळे विणत स्पर्धा परिक्षेच्या तयारीला लागतो.आपली वाटचाल सुकर करण्यासाठी आपण काढलेल्या अभ्यासाच्या नोट्स चे बुकलेटस बनवूनही विकतो.स्पर्धा परिक्षेत यश संपादन करुन पोलिस उपनिरीक्षक म्हणून पोलिस खात्यात रुजू होतो. प्रेमळ, दिलखुलास स्वभाव आणि माणुसकीचा उपजत पिंड लाभलेल्या शिरीष कृष्णात पवार या कमिटेड तरुणाचा पोलिस खात्यातील सेवेचा प्रवास तब्बल २५ वर्षांपूर्वी सुरु झाला. अभ्यासू वृत्ती, संघटन कौशल्य आणि आपल्या अखत्यारीतील प्रशासनावर जबरदस्त पकड यामुळे पोलिस खात्यात मिळालेल्या प्रत्येक जबाबदारीला त्यांनी न्याय दिला.आर्थिक गुन्हे असो वा अट्टल गुन्हेगारांचा शोध असो आपल्या कौशल्याने त्यांनी अनेक प्रकरणे तडीस नेली. काही वर्षांपूर्वी तर नवी मुंबईत चिंतेचा विषय ठरलेल्या सिरीयल किलरला जायबंदी करताना स्वतःच्या जीवाची पर्वा केली नाही.आपल्या कर्तव्याच्या कमिटमेंटला जीव धोक्यात घालण्याच्या जिद्दीची जोड देणे,हे शिरीष पवार यांच्या कार्यपद्धतीचे वैशिष्ट्य आहे.सध्या रायगड जिल्ह्यातील खोपोली येथे वरिष्ठ पोलिस निरीक्षकपदावर कार्यरत असलेल्या शिरीष पवार यांचा प्रजासत्ताक दिनी राष्ट्रपती पदक बहाल करुन गौरव करण्यात आला.त्यांचे आणि त्यांच्या जीवन प्रवासात खंबीर साथ देणारी पत्नी सौ.प्रतिमा,मुलगा सार्थक व आई-वडिलांचे मनःपूर्वक अभिनंदन!
–राजा माने,
संपादक, राजकीय विश्लेषक व माध्यम तज्ज्ञ.
अध्यक्ष, डिजिटल मिडिया संपादक पत्रकार संघटना महाराष्ट्र, मुंबई.
प्रदेशाध्यक्ष, व्हॉइस ऑफ मीडिया महाराष्ट्र.
शिरीष पवार यांचा मोबाईल नंबर:- +91 98701 55201