ग्लोरिया गर्ल्स हायस्कूल आग प्रकरणाचा पर्दाफाश करणार

आग दुर्घटनेस जबाबदार सबंधितांविरुध्द कारवाई करा
विरोधी पक्ष नेते प्रविण दरेकर
मुंबई, दि. १८ जानेवारी – शाळेच्या परिसरातील अनधिकृत दुकानांमुळे शाळेमध्ये आगीची दुर्घटना घडली असून या दुर्घटनेस जबाबदार असलेल्यांविरुध्द तातडीने कार्यवाही करण्याच्या दृष्टीने संबंधित यंत्रणांना सूचना देण्यात येतील. तसेच या दुर्घटनेचा पर्दाफाश करण्यात येईल असा इशारा विधानपरिषदेचे विरोधी पक्ष नेते प्रविण दरेकर यांनी आज दिला.
या शाळेला विरोधी पक्षनेते प्रविण दरेकर यांनी शालेय व्यवस्थापनाच्या विनंतीनुसार भेट दिली. यावेळी त्यांच्याबरोबर भाजप भायखळा विधानसभा अध्यक्ष नितीन बनकर तसेच इतर पदाधिकारी, कार्यकर्ते उपस्थित होते. दरेकर यांनी शाळेच्या शिक्षिका, पालक यांच्याशी या विषयाबाबत चर्चा केली. आणि आग लागलेली घटना तसेच सर्व समस्या समजून घेतल्या. विद्यार्थ्यांशीही संवाद साधला आणि त्यांच्याशी समस्यांबाबत चर्चा केली. यावेळी भाजपचे नेते मधू चव्हाण, भाजपा भायखळा विधानसभा अध्यक्ष नितीन बनकर, नगरसेविका सौ. सुरेखा लोखंडे व भायखळा विधानसभेतील भाजपाचे कार्यकर्ते, विद्यार्थ्यांचे पालकही उपस्थित होते.
भायखळा येथील सेंट ग्लोरिया गर्ल्स हायस्कूलच्या परिसरातील १२ अनधिकृत लाकडांच्या दुकानांना १० जानेवारी रोजी पहाटे आग लागली. या आगीची झळ शाळेला पोहोचली आणि शाळेतही आगीने उग्र रूप धारण केले. शाळेच्या तिस-या माजल्यापर्यंत ही आग पोहोचली. या आगीत सुदैवाने कोणतीही जीवितहानी झाली नाही. परंतु शाळेच्या परिसरात अनेक अनधिकृत लाकडाची गोदामे आहेत. जर ही आग शाळा सुरू असताना ही दुर्घटना घडली असती तर अनेक विद्यार्थी यामध्ये होरपळली असती अशी भीतीही दरेकर यांनी व्यक्त केली.
जी शाळा गोरगरीबांना मदत करते, जी शाळा गोरगरिबांसाठी काम करतेय तिला सहकार्य करणे, त्या पालकांना मदत करणे, दिलासा देणे आणि त्या विद्यार्थ्यांचे भविष्य घडवणे हे करायला पाहिजे तर येथील नगरसेवक जे मुंबई महापालिकेच्या स्थायी समितीचे अध्यक्षही आहेत त्यांना विद्यार्थ्यांचे काहीही पडलेले नाही, पालकांचे काहीही पडलेले नाही. त्यांचे इंटरेस्ट वेगळे आहेत. या सर्व गोष्टींचा पर्दाफाश केल्याशिवाय राहणार नाही, असा इशारा विधान परिषदेचे विरोधी पक्षनेते प्रविण दरेकर यांनी देतानाच आगामी अधिवेशनात हा प्रश्न प्रधान्यक्रमाने मांडणार असल्याचे दरेकर यांनी सांगितले.
आगीच्या दुर्घटनेनंतर शाळेत अनेक असुविधा निर्माण झाल्या आहेत. परंतु पालिका प्रशासन याकडे लक्ष देत नाही. अशी व्यथाही शाळेतील शिक्षक व कर्मचारी यांनी दरेकर यांच्याकडे मांडली. त्यामुळे या शाळेच्या पुनर्स्थितीबाबत महापालिका आयुक्तांकडे पाठपुरावा करण्यात येईल व शाळेतील असुविधा प्राधान्याने सोडविण्यात येतील असेही दरेकर यांनी स्पष्ट केले.
दरेकर म्हणाले की, महापालिका आणि या विभागातील नगरसेवक यांच्या प्रायोरिटी काय आहेत, चुकीच्या लोकांना पाठीशी घालून, त्यांच्याकडून मलिदा खाऊन त्यांना मदत करणे यामुळे अशा घटना घडतात आणि एवढी मोठी अनधिकृत दुकानांची बांधकामे उभी राहतात. या सर्व प्रकरणाचा पर्दाफाश केल्याशिवाय राहणार नाही असेही दरेकर यांनी स्पष्ट केले.