पुणे : दिवसभरात पुण्यात तब्बल ४४४ जणांना कोरोनाची लागण झाली आहे. गेल्या आठवड्यात जेमतेम सातशेवर असलेली ॲक्टिव्ह रूग्णांची संख्या दोन हजार आठशेवर जाऊन पोचली आहे.त्यामुळे येता काही चार दिवसात पुणेकरांना नव्या निर्बंधांना सामोरे जावे लागण्याची शक्यता व्यक्त करण्यात येत आहे.पालकमंत्री अजित पवार यांची उद्या आढावा बैठक होणार आहेत.या बैठकीत पुण्यातील स्थितीबाबत सविस्तर आढावा घेण्यात येणार आहे. त्यानंतर निर्बंधाबाबत निर्णय होण्याची शक्यता व्यक्त करण्यात येत आहे. पुण्यातील रूग्णसंख्या झपाट्याने वाढत आहे. गेल्या आठवड्यात पुण्यात सुमारे साडेसातशे रूग्ण होते. रूग्णवाढीचा दर स्थिर होता.मात्र, रूग्णांचे आकडे रोजच वाढू लागल्याने केवळ सहा-सात दिवसात हा आकडा दोन हजार ८३८ वर पोचला आहे.पुणे शहरात उपचार घेणाऱ्या २८३८ रुग्णांपैकी १०१ रुग्ण गंभीर तर ८१ रुग्ण ऑक्सिजनद्वारे उपचार घेत आहेत.
पुण्याचे महापौर मुरलीधर मोहोळ यांनी शहरातील स्थितीचा आढावा घेतला. रूग्ण वाढतील असे गृहीत धरून महापालिकेच्या आरोग्य विभागाकडून तयारी करण्यात येत असल्याचे त्यांनी सांगितले.महापौर मोहोळ म्हणाले, ”२७ डिसेंबरपासून रूग्ण वाढू लागले आहेत.गेल्या आठ दिवसांत रूग्णसंख्या चौपाटीने वाढली आहे.जवळपास रोज ८० ते ८५ टक्के दोन्ही डोस घेतलेले लोक कोरोना बाधित होत आहेत. सौम्य लक्षणे आहेत पण दोन्ही डोस झालेल्या लोकांनाही कोरोनाची लागण होत आहे.”
रूग्णसंख्या वाढत असली तरी केवळ तीनशेचाळीस रूग्णांना रूग्णालयात जाऊन उपचाराची गरज पडल्याचे महापौर मोहोळ यांनी सांगितले. महापालिकेकडे चार हजार रेमिडिसिव्हीर इंजेक्चनचा साठीआहे. एक हजार ८०० बेड उपलब्ध आहेत.दर मिनिटला नऊ हजार ५०० लिटर ऑक्सिजन तयार करण्याची यंत्रणा कार्यान्वित करण्यात आली आहे.जम्बो हॉस्पिटलमध्ये तयारी सुरू आहे.गरज पडली तर केवळ आठ दिवसात पूर्ण क्षमतेचे हे हॉस्पिटल सुरू करता येऊ शकते, असे महापौर मोहोळ यांनी सांगितले.
पालकमंत्री अजित पवार यांच्या अध्यक्षतेखाली उद्या पुण्यात बैठक होणार असून त्यानंतर नवे नियम व निर्बंधाबाबत निर्णय होऊ शकतो,असे महापौर मोहोळ यांनी सांगितले. नागरीकांनी नियमांचे पालन करीत काळजी घेण्याची गरज आहे, असे आवाहन महापौर मोहोळ यांनी केले.
