पुणे – गुजरात विधानसभेच्या निवडणुकीसाठी काँग्रेसकडून माजी मुख्यमंत्री पृथ्वीराज चव्हाण यांना प्रचाराची जबाबदारी देण्यात आली आहे. यामध्ये त्यांना बडोदा व अहमदाबाद या विभागाचे निरीक्षक म्हणून जबाबदारी पक्ष नेतृत्वाने सोपविली असल्याचे सोमवारी जाहीर करण्यात आले.
निवडणूक आयोगाने गुजरात विधानसभा निवडणुकीच्या तारखा जाहीर केल्या असून राज्यात दोन टप्प्यात मतदान होणार आहे. गुजरातमध्ये पहिल्या टप्प्यात 98 जागांसाठी 1 डिसेंबरला आणि दुसऱ्या टप्प्यात 93 जागांसाठी 5 डिसेंबरला मतदान होणार आहे.गुजरातमधील सर्व 182 जागांसाठी 8 डिसेंबरला एकाच वेळी मतमोजणी होणार आहे. गुजरातमध्ये 4.91 कोटी मतदार असून त्यापैकी 4.61 लाख नवीन मतदार असल्याचे निवडणूक आयोगाने सांगितले.
चव्हाण गुजरातमधील अहमदाबाद दौऱ्यावर पुढील 4 दिवस असतील. येथे ते राज्य व जिल्हानिहाय पदाधिकारी व कार्यकर्त्यांशी मिटिंग घेऊन संवाद साधणार आहेत. गुजरात राज्याच्या पाच विभागाची जबाबदारी काँग्रेसने महत्वाच्या पाच नेत्यांवर सोपविली आहे त्यानुसार महाराष्ट्रातून काँग्रेसने माजी मुख्यमंत्री चव्हाण आणि खासदार मुकुल वासनिक यांच्यावर जबाबदारी सोपविली आहे.गुजरात काँग्रेस पक्षाचे प्रभारी म्हणून पृथ्वीराज चव्हाण यांनी उत्तमरित्या जबाबदारी याआधी निभावली आहे. त्यांच्या कार्यकाळात काँग्रेसने २००४ मध्ये गुजरात मध्ये १२ खासदार निवडून आणले. त्याच वर्षी गुजरातच्या खासदारांच्या संख्येमुळे काँग्रेस हा लोकसभेत एक नंबरचा पक्ष ठरला होता आणि काँग्रेस पक्ष मित्र पक्षांच्या साहाय्याने सत्तेवर आला होता.
गुजरात विधानसभा निवडणूक 2022 साठी काँग्रेसने मुकुल वासनिक, मोहन प्रकाश, पृथ्वीराज चव्हाण, बीके हरिप्रसाद आणि केएच मुनियप्पा यांची विभागीय निरीक्षक म्हणून नियुक्ती केली आहे. त्याचबरोबर 32 नेत्यांना लोकसभा निरीक्षक बनवण्यात आले असून त्यात प्रेमसाई सिंग टेकम आणि अशोक बैरवा यांच्या नावांचा समावेश आहे.
याशिवाय शकील अहमद खान, शिवाजी राव मोगे, कांतीलाल भुरिया, राजेश लिलोथिया आणि जय किशन यांना इतर निरीक्षक करण्यात आले आहेत. गुजरात विधानसभा निवडणूक 2022 संदर्भात आज ‘टास्क फोर्स-2024’ ची बैठक होणार आहे, ज्यामध्ये निवडणूक रणनीतीवर चर्चा केली जाणार आहे.
.
