फर्ग्युसन च्या प्राचार्यांकडून २२ विद्यार्थ्यांवर कारवाई — प्राचार्यांचीच चौकशी करा .. राष्ट्रवादीची मागणी

पुणे – कॉलेज आवारातील देशद्रोही घोषणाबाजीबाबत  ची पोलिसात दिलेली तक्रार फर्ग्युसन च्या प्राचार्यांनी मागे घेतल्याचे प्रकरण ताजे असतानाच .. त्यांनी आता  २२ विद्यार्थ्यांवर कारवाई केल्याचा आरोप करीत आज या प्रचार्यांचीच चौकशी करून त्यंच्यावर कडक कारवाई करण्याची मागणी राष्ट्रवादी ने  मुख्यमंत्र्यांकडे केली आहे.विद्यार्थ्यांनी कोणत्याही प्रकारच्या देशविरोधी घोषणा दिल्या नाहीत. तर केवळ मनुवाद आणि साम्राज्यवादाविरोधी घोषणा देण्यात आल्या, असे म्हणत उपायुक्त तुषार दोशी यांनी विद्यार्थ्यांना क्लिन चिट दिली असताना आता हा नवा प्रकार काय ? असा प्रश्न उपस्थित झाला आहे .
येथील फर्ग्युसन कॉलेज मधील विद्यार्थ्यांनी आक्षेपार्ह घोषणा केल्याच्या कारणावरून सदर कॉलेजच्या प्राचार्यांनी २२ विद्यार्थ्यांवर कारवाई केली आहे, हे वृत्त समजताच राष्ट्रवादी युवक काँग्रेसचे प्रदेशाध्यक्ष आमदार निरंजन डावखरे आणि राष्ट्रवादी विद्यार्थी काँग्रेसचे प्रदेशाध्यक्ष संग्राम कोते पाटील यांनी सदर घटनेची संपूर्ण माहिती घेऊन महाराष्ट्राचे मुख्यमंत्री देवेंद्र फडणवीस यांची भेट घेतली. तसेच निवेदनाच्या माध्यमातून सदर घटनेतील विद्यार्थ्यांनी अशाप्रकारचे गैरवर्तन केलेले नसून त्यांच्यावर केलेली कारवाई थांबवावी आणि संबंधित प्राचार्यांची चौकशी करून त्यांच्यावर कारवाई करावी, अशी मागणी केली. यावेळी मुख्यमंत्र्यांनी कोणत्याही निरपराध विद्यार्थ्यांवर कारवाई केली जाणार नाही, असे ठामपणे आश्वासन दिले. यावेळी राष्ट्रवादी युवक काँग्रेस आणि विद्यार्थी काँग्रेसचे पदाधिकारी व कार्यकर्ते मोठ्या संख्येने उपस्थित होते.