मुंबई-अंडरवर्ल्ड डॉन दाऊद इब्राहिमचा भाऊ इक्बाल कासकरने नवाब मलिक यांचे नाव घेतले होते. ईडीने त्यांना सकाळी 7.45 वाजता मुंबईतील कार्यालयात चौकशीसाठी नेले होते.ईडीच्या सूत्रांनी दिलेल्या माहितीनुसार, नवाब मलिक चौकशीत अधिकाऱ्यांना सहकार्य करत नव्हते, त्यामुळेच त्यांना अटक करण्यात आली आहे. मलिकांना अटक केल्यानंतर ईडीच्या पथकाने त्यांना रुग्णालयात नेले आहे, जिथे त्यांची वैद्यकीय तपासणी करण्यात आली. आता त्यांना विशेष पीएमएलए न्यायालयात हजर करण्यात आले आहे
नेमके काय आहे प्रकरण –
महाराष्ट्राचे कॅबिनेट मंत्री आणि राष्ट्रवादीचे नेते नवाब मलिक यांना अंडरवर्ल्डशी असलेल्या कथित संबंधांबद्दल सुमारे आठ तासांच्या चौकशीनंतर अंमलबजावणी संचालनालयाने (ईडी) अटक केली आहे. नवाब मलिक यांची कुर्ल्यातील जमिनीच्या संदर्भात चौकशी केली जात आहे, जी त्यांनी अनेक वर्षांपूर्वी कवडीमोल दरात विकत घेतली होती, असा आरोप माजी मुख्यमंत्री देवेंद्र फडणवीस यांनी मलिक यांच्यावर केला. काय आहे हे प्रकरण?
राष्ट्रीय तपास संस्थेने (NIA) अंडरवर्ल्ड डॉन दाऊद इब्राहिम आणि छोटा शकीलसह डी-कंपनीच्या सात जणांविरुद्ध एफआयआर नोंदवला होता. हे लोक भारतात होत असलेल्या दहशतवादी कारवायांमध्ये सामील असल्याचा दावा तपास संस्थेने केला आहे. पाकिस्तानस्थित दहशतवादी संघटना जैश-ए-मोहम्मद, जमात-उद-दावा आणि अल कायदा यांसारख्या दहशतवादी संघटनांशी त्यांचे संबंध आहेत.अतिमहत्त्वाच्या व्यक्तींवर हल्ला करण्याचा कट आखला जात असेल तर त्यासाठी मोठ्या प्रमाणावर पैसाही गुंतवला असल्याचा संशय होता. त्यानंतर ईडीने दाऊद इब्राहिम आणि त्याच्या जवळच्या व्यक्तींविरोधात मनी लाँड्रिंगचा गुन्हा दाखल केला. त्यानंतर ईडीने मुंबईत छापादेखील मारला होता. ईडीने दाऊद इब्राहिमचा भाऊ इक्बाल कासकर याला अटक केली. तो सध्या ईडी कोठडीत आहे. अंडरवर्ल्ड डॉन दाऊद इब्राहिमचा भाऊ इक्बाल कासकरविरोधात २०१७ मध्ये ठाणे पोलिसात पैसे उकळल्याचा गुन्हा दाखल झाला होता. ठाणे पोलिसांनी त्यावेळी त्याला बेड्याही ठोकल्या होत्या. तेव्हापासून इक्बाल कासकर तुरुंगात आहे. ईडीने कोर्टात सांगितले की, इक्बाल कासरकर डी गँगचा सदस्य आहे. तो लोकांना धमकावून वसूली करतो. भारतातील सेलेब्रिटींना धमकावून इक्बाल पैशांची वसूली करतो. दाऊदच्या नावाखाली तो लोकांना कोट्यवधी रुपयांना लुबाडत असल्याचेही सांगण्यात आले. ईडीने मनी लाँड्रिंग प्रकरणी मुंबईत छापेमारी केली होती. यामध्ये दाऊदचे नातेवाईक आणि जवळच्या व्यक्तींचा समावेश होता. दाऊद आणि त्याच्याशी संबंधित मालमत्ता खरेदी करणारे, व्यवहार करणारे राजकारणी आणि इतर महत्त्वाच्या व्यक्ती ईडीच्या रडारवर आले होते.या कागदपत्रांच्या आधारे एनआयएने (NIA) नुकताच गुन्हा नोंदवला असून या प्रकरणाच्या आधारे ईडीने मनी लाँड्रिंगचा गुन्हा दाखल केला आहे. ईडी छोटा शकीलचा मेहुणा सलीम याची चौकशी करत आहे. बनावट कागदपत्रांच्या सहाय्याने सलीम अनेक वेळा पाकिस्तानात गेल्याचा संशय एजन्सींना आहे. तो दाऊद आणि शकीलच्या सांगण्यावरून मुंबईत काम करतो, असा ईडीचा विश्वास आहे. ईडी त्याच्या बँक खाते आणि संपत्तीची माहिती गोळा करत आहे. ईडीला संशय आहे की हे लोक खंडणी, सेटलमेंट आणि ड्रग्सद्वारे पैसे जमा करतात आणि त्याचा वापर दहशतवादी कारवाया किंवा हवालाद्वारे देशविरोधी कारवायांसाठी करतात. ईडी त्यांच्या मनी ट्रेलचा शोध घेत आहे.दरम्यान, दाऊद इब्राहिम मनी लॉन्ड्रिंग प्रकरणात ईडीने आतापर्यंत 6 जणांचे जबाब नोंदवले आहेत. याच प्रकरणी ईडीने 2 बिल्डरांना समन्स पाठवले असून, त्यांचे जबाबही नोंदवले जाणार आहेया संपूर्ण मनी लॉन्ड्रिंग प्रकरणात आरोपींनी डिजिटल वॉलेट आणि डार्कनेटचा वापर करून पैसे इकडे तिकडे ट्रान्सफर केले आहेत. या संपूर्ण प्रणालीचा वापर २०१९ च्या सुमारास सुरू करण्यात आल्याचे सांगण्यात येत आहे. खंडणी, ड्रग्ज, रिअल इस्टेट आणि सट्टेबाजीमध्ये अंडरवर्ल्ड अजूनही भारतात सक्रिय असल्याचे ईडीच्या सूत्रांनी सांगितले
कोर्टातील सुनावणीचे अपडेट्स…
- कोर्टात सुनावणीदरम्यान, नवाब मलिक यांनी कोर्टाला सांगितले की, त्यांना समन्स बजावण्याच्या बहाण्याने पहाटे घरी आलेल्या ईडीच्या टीमने त्यांना कसे ताब्यात घेतले आणि नंतर समन्सच्या प्रतीवर सही करण्यास सांगितले.
- यानंतर, ईडीच्या वतीने अतिरिक्त सॉलिसिटर जनरल यांनी न्यायालयाला सांगितले की, 3 फेब्रुवारी 2022 रोजी दाऊद इब्राहिम कासकरविरोधात एफआयआर नोंदवण्यात आला होता. विविध दहशतवादी कारवाया आणि मनी लाँड्रिंगमध्ये त्यांचा सहभाग आहे. दहशत निर्माण करण्यासाठी निधी उभारून अनधिकृतपणे मालमत्ता मिळवण्यातही त्यांचा सहभाग आहे.
- ASG ने पुढे माहिती दिली की, दाऊदची बहीण हसिना पारकर यांचे निधन झाले आहे. ती येथील दाऊदच्या कारवायांवर नियंत्रण ठेवत होती. पैसा जमवून तिने भरपूर संपत्ती कमावली होती. कुर्ल्यातील गोवाला कंपाऊंडमध्ये त्यांनी मालमत्ता घेतली होती.
- ASG: पुढे म्हणाले की, त्याने मालमत्ता कशी मिळवली हे आम्ही (ईडी) सिद्ध करू. मुनिरा आणि मरियम या संपत्तीच्या खऱ्या मालक आहेत. एएसजीने पुढे सांगितले की ही मालमत्ता वडिलोपार्जित मालमत्ता आहे. तिच्या आई-वडिलांच्या मृत्यूनंतर मालमत्तेची ती एकमेव मालक होती.
- एएसजीने पुढे सांगितले की, हसिना पारकरचा सहकारी सलीम पटेल यांना अतिक्रमण काढण्यासाठी आणि जमीन विकू नये म्हणून पॉवर ऑफ अॅटर्नी देण्यात आली होती. 1993 च्या बॉम्बस्फोटात सरदार खानचाही सहभाग होता.
- एएसजीने पुढे सांगितले की मुनिरा आणि तिच्या बहिणीने मालमत्तेतील त्यांचे हक्क विकण्यासाठी कोणतेही मुखत्यारपत्र दिलेले नाही. मीडिया रिपोर्ट्सवरून त्यांना समजले की सरदार खानने ही मालमत्ता विकली होती. सरदार खान हा या जमिनीचे भाडे घेणाऱ्याचा भाऊ आहे.
- ASG:: मुनिरा आणि तिच्या बहिणीला समजले की ही मालमत्ता नवाब मलिक यांना त्यांच्या एका कंपनीद्वारे विकली गेली.
- ASG:: मुनिरा यांनी ईडीला सांगितले की त्यांना मालमत्तेसाठी कोणतेही पैसे मिळालेले नाहीत. मालमत्तेच्या योग्य मालकांना एकही रुपया दिला गेला, हे दाखवण्यासाठी काहीही नाही. सलीम पटेल यांनी बेकायदेशीरपणे मालमत्ता विकली.
- ASG: हसिना पारकरने नंतर नवाब मलिक यांना 55 लाख रुपयांना संपत्तीचे अधिकार हस्तांतरित केले. आमच्याकडे पीएमएलए कायद्याच्या कलम 19 ची अट पूर्ण करण्यासाठी पुरेसे पुरावे आहेत.
- ASG: हसिना पारकरने नंतर नवाब मलिक यांना 55 लाख रुपयांना संपत्तीचे अधिकार हस्तांतरित केले. या मालमत्तेची खरी किंमत 3.3 कोटी होती, मात्र ती केवळ 50 लाखांमध्ये खरेदी करण्यात आली. पॉवर ऑफ अॅटर्नीद्वारे बेकायदेशीरपणे मालमत्ता खरेदी करण्यात आली होती. आता त्यांना ही मालमत्ता विकसित करायची आहे. पीएमएलए कायद्याच्या कलम 19 ची अट पूर्ण करण्यासाठी आमच्याकडे मलिकांविरुद्ध पुरेसे पुरावे आहेत.
- ASG: पॉवर ऑफ अॅटर्नी असलेले आणि हसिना पारकरचे नियंत्रण असलेल्या सलिन पटेल यांनी आरोपीच्या मालकीच्या एका कंपनीला मालमत्ता विकली.
- ASG: मलिक यांच्या विरोधात पुरेसे पुरावे असल्याचे सांगत अनिल सिंग यांनी न्यायालयाकडे 14 दिवसांची कोठडी मागितली आहे.
