‘कोरोना’ बाधित 7 रुग्णांचा मृत्यू
विभागात 53 नवीन रुग्णांचे निदान
विभागात 40 कोरोना बाधित रुग्ण बरे होऊन घरी
विभागात एकूण रुग्ण संख्या 246
पुणे दि.9 : पुणे विभागात आज 53 नवीन रुग्णांची नोंद झाली. यामुळे विभागातील ‘कोरोना’ बाधित रुग्णांची संख्या 246 झाली आहे. आज विभागात 7 कोरोना बाधित रुग्णांचा मृत्यू झाला आहे. 24 तासामध्ये अहवाल प्राप्त झालेल्या मृत्यू पैकी 6 पुणे महानगरपालिका क्षेत्रातील असून 1 बारामती मधील रहिवासी असल्याचे विभागीय आयुक्त डॉ.दीपक म्हैसेकर यांनी प्रसिध्दीस दिलेल्या पत्रकात म्हटले आहे.
सहयाद्री हॉस्पीटल,कर्वेरोड येथे पुण्यातील 42 वर्षीय कोरोना बाधित पुरुष रुग्णाचा मृत्यू झाला आहे. सदर रुग्णास श्वसन संस्थेतील जंतू संसर्ग, अल्कोहोलीक लिवर व मधुमेहाचा विकार होता.
ससून हॉस्पीटल येथे पुण्यातील 63 वर्षीय कोरोना बाधित महिला रुग्णाचा मृत्यू झाला आहे. सदर रुग्णास निमोनिया व किडनीचा विकार होता.
पुण्यातीलच 60 वर्षीय कोरोना बाधित पुरुष रुग्णाचा ससून हॉस्पीटल येथे मृत्यू झाला आहे. सदर रुण्गास निमोनिया व किडनी विकार होता.
बारामतीमधील 65 वर्षीय पुरुष रुण्गाचाही मृत्यू ससून हॉस्पीटल येथे झाला आहे. सदर रुग्णास निमोनिया विकार होता. तर नोबल हॉस्पीटल येथे पुण्यातील 62 वर्षीय कोरोना बाधित पुरुष रुग्णाचा मृत्यू झाला आहे. सदर रुग्णास निमोनिया, मधूमेह व या रुग्णाचे बहू अवयव निकामी झाली होते. जहांगीर हॉस्पीटल येथे पुण्यातील 62 वर्षीय कोरोना बाधित महिला रुग्णाचा मृत्यू झाला आहे. सदर रुग्णास मधूमेह व अल्सरचा विकार होता. ससून हॉस्पीटल येथे 58 वर्षीय कोरोना बाधित महिला रुग्णाचा मृत्यू झाला आहे. या रुग्णास निमोनिया व तीव्र श्वसन विकार होता, असे म्हटले आहे.
पुणे विभागातील बाधित रुग्ण व मृत्यू यांची संख्या
क्र जिल्हा/मनपा/ बाधीत रुग्ण /मृत्यू
1 पुणे (पुणे मनपा) 176 /21
2 पुणे पिंपरीचिंचवड मनपा) 22/ 0
3 पुणे ग्रामीण 12/ 1
4 सोलापूर 0/ 0
5 कोल्हापूर 4/ 0
6 सातारा 6/ 1
7 सांगली 26/ 0
एकुण 246 /23
कोरोना विषाणूचा प्रादुर्भाव रोखण्यासाठी विभागातील पुणे महानगरपालिका क्षेत्रामधील एकूण 35 चौरस कि.मी. क्षेत्र प्रतिबंधित क्षेत्र म्हणून घोषित करण्यात आले आहे. एकूण 15 वार्ड पैकी 2 वार्डमध्ये पूर्ण संचार बंदी लागू करण्यात आली असून 7 वार्डामधील प्रत्यकी 1 प्रभागामध्ये संचार बंदी लागू करण्यात आली आहे. यामुळे सुमारे 10 लाख 50 हजार इतकी लोक संख्या प्रभावित झाली आहे. नागरिंकासाठी पुणे महानगरपालिका व पुणे सिटी कनेक्ट यांच्या वतीने आणि कनेक्टींग संस्थेच्या सहकार्याने मुख्यत्वे वसत्यामधील नागरिकांसाठी ‘कोरोना विरुध्द वसती मित्र हेल्प लाईन’ सुरु करण्यात आली असून सकाळी 10 ते संध्याकाळी 6 वा.यावेळेमध्ये 020-65506923/24/25 या दुरध्वनी क्रमांकावर नागरिकांना संपर्क साधता येईल.
पिंपरी-चिंचवड महानगरपालिका क्षेत्रामध्ये 4 ठिकाणी, बारामती नगर परिषद क्षेत्रामध्ये 2 ठिकाणी व इस्लामपूर नगरपरिषद क्षेत्रामध्ये 1 ठिकाणी प्रतिबंधित क्षेत्र म्हणून घोषित करण्यात आले असून याठिकाणी संचार बंदी लागू करण्यात आली आहे. आजपर्यंत विभागामध्ये एकूण 3 हजार 754 नमूने तपासणीसाठी पाठविण्यात आले होते. त्यापैकी 3 हजार 599 नमून्यांचा अहवाल प्राप्ता झाला आहे. 155 नमून्यांचा अहवाल प्रतिक्षेत आहे. प्राप्त अहवाला पैंकी 3 हजार 297 नमून्यांचा अहवाल निगेटिव्ह असून 246 नमून्यांचा अहवाल पॉझीटिव्ह आहे.
आजपर्यंत विभागातील 22 लाख 34 हजार 974 घरांचे सर्वेक्षण पूर्ण करण्यात आले असून त्याअंतर्गत 92 लाख 440 व्यक्तींची तपासणी केली आहे. त्यापैकी 732 व्यक्तींना अधिक तपासणीसाठी संदर्भीत करण्यात आले असल्याचे त्यांनी म्हटले आहे.
