पुणे –जनतेची फसवणूक करुन त्यांच्या आरोग्याला धोका उत्पन्न होईल असे उपचार बोगस डॉक्टर करतात. हे बेकायदेशीर असून अशा बोगस डॉक्टरांवर प्रभावी आणि त्वरित कायदेशीर कार्यवाही व्हावी यासाठी सर्व संबधितांनी एकत्र येऊन विशेष पथक स्थापन करावे अशी सूचना अतिरिक्त जिल्हाधिकारी रमेश काळे यांनी केली.
बोगस डॉक्टरांवर करण्यात आलेल्या कारवाईचा आढावा घेण्यासाठी आयोजित करण्यात आलेल्या बैठकीत ते बोलत होते. या बैठकीत जिल्हयात बोगस डॅाक्टरांवर करण्यात आलेल्या कारवाईचा आढावा घेण्यात आला. पोलीस प्रशासन आणि जिल्हा परिषद आरोग्य विभागाच्या अधिकाऱ्यांनी यावेळी बोगस डॉक्टरांवर दाखल करण्यात आलेले खटले व त्याची प्रगती याबद्दल बैठकीत माहिती दिली. बोगस डॉक्टरांवर कारवाई करतानाच बोगस पदव्या देणाऱ्या संस्थांविरुध्द कायद्यातील तरतुदीनुसार कडक कारवाई करण्याच्या सूचना यावेळी अतिरिक्त जिल्हाधिकाऱ्यांनी संबधितांना दिल्या.
बैठकीत बोगस डॉक्टरांवर कारवाई करताना येणाऱ्या अडचणी व त्यावरील उपाययोजनांबाबत चर्चा करण्यात आली. त्याचप्रमाणे न्यायालयीन प्रकरणे व पोलीसांत दाखल करण्यात आलेल्या प्रकरणांचा आढावा घेण्यात आला.
बैठकीला जिल्हा परिषदेचे आरोग्य अधिकारी, जिल्हयातील गट विकास अधिकारी, पोलीस निरिक्षक, बी.जे.वैद्यकीय महाविद्यालयाचे सहायक अधिक्षक उपस्थित होते.
