पुणे –आरोप-प्रत्यारोपातून झालेल्या शाब्दिक वादानंतर अतिरिक्त आयुक्त राजेंद्र निंबाळकर यांना मारहाण केल्याच्या प्रकरणात काँग्रेसचे नगरसेवक अरविंद शिंदे यांना मंगळवारी कोर्टाने तात्पुरता जामीन मंजूर केला. पासपोर्ट जमा करावा, दर मंगळवारी शिवाजीनगर पोलिस स्टेशनला हजेरी लावावी, या अटींवर शिंदे यांना जामीन मंजूर करण्यात आला. सत्र न्यायाधीश ए. वाय. थत्ते यांच्या कोर्टाने हा आदेश दिला. तर नगरसेवक रवींद्र धंगेकर यांनी अद्याप जामिनासाठी अर्ज केलेला नाही.
या प्रकरणी आयुक्त निंबाळकर यांनी सोमवारी रात्री उशिरा शिवाजीनगर पोलिसांत फिर्याद दिली होती. नगरसेवक अरविंद शिंदे आणि रवींद्र धंगेकर यांच्यासह १५ ते १७ कार्यकर्त्यांवर गुन्हा दाखल करण्यात आला आहे. या प्रकरणात अटकपूर्व जामीन मिळावा म्हणून शिंदे यांनी अॅड. विजयसिंह ठोंबरे पाटील, अॅड. रुपाली पाटील, अॅड. हितेश सोनार आणि अॅड. पुष्कर पाटील यांच्यामार्फत अर्ज केला होता.
जलपर्णी काढण्यासाठीच्या निविदांमध्ये झालेल्या गैरव्यवहारांची चौकशी करावी, या मागणीसाठी ठिय्या आंदोलन करण्यात आले होते. निंबाळकर यांनी दिलेल्या फिर्यादीवरून मला चोर व भ्रष्टाचारी म्हणण्याची त्यांची लायकी आहे का, असे विधान केल्याचे कबूल केले आहे. त्यामुळे असे बोलून त्यांनीच जमाव भडकावला. शिंदे यांनी वैयक्तिक कोणाला मारहाण केलेली नाही. तसेच, सरकारी कामात अडथळा आणला नाही, असा युक्तिवाद शिंदे यांचे वकील अॅड. विजयसिंह ठोंबरे-पाटील यांनी कोर्टात केला. कोर्टाने शिंदे यांचा अटकपूर्व जामीन मंजूर केला. शिंदे यांच्या अर्जावर पोलिसांना २७ फेब्रुवारी रोजी बाजू मांडण्याचे आदेश कोर्टाने दिले आहेत.
