नागपूर – कडक शिस्तीसाठी लोकप्रिय म्हणून माध्यमांनी नेहमीच डोक्यावरचा सरताज बनविलेले ,येथील महापालिका आयुक्त तुकाराम मुंढे यांची परत एकदा बदली झाली आहे. मुंढे आता मुंबईत महाराष्ट्र जीवन प्राधिकरणाचे सदस्य सचिव म्हणून कामकाज पाहतील. दरम्यान, कोरोनाची लागण झाल्यामुळे मुंढे सध्या आयसोलेशनमध्ये आहेत.
नागपूर महापालिकेच्या आयुक्तपदी निवड झाल्यापासूनच मुंढे यांचे नगरसेवकांशी वाद सुरु झाला होता. सर्वपक्षीय नगरसेवकांचा तुकाराम मुंढे यांना विरोध होता. मुंढे यांनी शहरात कडक निर्बंध आणले होते. यावरुन नागपूरचे महापौर संदीप जोशी आणि तुकाराम मुंढे असा वादही पाहायला मिळाला होता. अखेर मुंढेची बदली झाली आणि आता ते महाराष्ट्र जीवन प्राधिकरणाच्या सदस्य सचिवपदाचा कारभार सांभाळतील. दरम्यान, मुंढे यांच्या जागी राधाकृष्णन बी यांची नागपूरच्या आयुक्तपदी नियुक्ती करण्यात आली आहे.
