नवी दिल्लीत १३ व १४ फेब्रुवारी रोजी दोन दिवसीय परिषदेचे आयोजन
पुणे :- क्रेडाई नैशनलकडून येत्या १३ व १४ फेब्रुवारी ला नवी दिल्लीतील तालकटोरा स्टेडीअम येथे क्रेडाई युथकॉन२०१९चे आयोजन करण्यात आले आहे. यावेळी पंतप्रधान नरेंद्र मोदी पहिल्यांदाच ३००० हून अधिक विकासकांसोबत संवाद साधणार आहेत. १३ फेब्रुवारीला केंद्रीय राज्यमंत्री हरदीप सिंग पुरी यांच्या हस्ते या कार्यक्रमाचे उद्घाटन होणार असून १४ फेब्रुवारीला पंतप्रधान नरेंद्र मोदी क्रेडाईमधील युवा विकसकांना मार्गदर्शन करणार आहेत.अशी माहिती क्रेडाई महाराष्ट्राचे अध्यक्ष शांतीलाल कटारिया यांनी दिली.ते पुढे म्हणाले कि, क्रेडाई युथकॉन हा क्रेडाईच्या युथविंगचा नाविन्यपूर्ण उपक्रम भारतातील तरुण विकासकांसाठी एक सुयोग्य व्यासपीठ ठरणार आहे. हेच तरुण विकसक भविष्यातील बांधकाम क्षेत्राच्या प्रगतीचे चालक ठरणार आहेत.
यावेळी उपराष्ट्रपती व्यंकय्या नायडू, महारेराचे अध्यक्ष गौतम चटर्जी, केंद्रीय मंत्री पियुष गोयल, नीती आयोगाचे मुख्य कार्यकारी अधिकारी अमिताभ कांत यांसारखे मान्यवर उपस्थितांना मार्गदर्शन करणार आहेत.
परवडणाऱ्या घरे , रेरामुळे बांधकाम क्षेत्रात आलेली पारदर्शकता,पायाभूत सुविधांची प्रगती, भारतीय अर्थव्यवस्थेची सध्य स्थितीचा बांधकाम क्षेत्रावर होणारा परिणाम अशा महत्वाच्या मुद्द्यांवर यावेळी चर्चा होणार आहे.
क्रेडाई नैशनलचे प्रेसिडेंट (इलेक्ट) सतीश मगर म्हणाले कि, क्रेडाई युथकॉन २०१९ हि भारतातील सर्वात मोठी व भव्य रियल इस्टेट परिषद आहे. भारतातील बांधकाम क्षेत्राच्या विकासाठी क्रेडाई अविरत प्रयत्न करत आहे. यातून भारताच्या अर्थव्यवस्थेच्या प्रगतीसाठी अत्यंत लाभदायक वातावरण निर्माण करण्याचे आमचे ध्येय आहे.
