नवी दिल्ली, 26 एप्रिल 2022
पोलाद आणि ग्रामीण विकास राज्यमंत्री फग्गनसिंग कुलस्ते यांनी आज नवी दिल्लीत एका परिषदेत सांगितले की, देशाने एक लाख कोटी रुपयांचे 13.5 दशलक्ष टन तयार पोलाद निर्यात केले आणि सुमारे 46,000 कोटी रुपयांचे पोलाद आयात केले. पोलाद क्षेत्राच्या प्रभावी कामगिरीने भारतातून 420 अब्ज अमेरिकी डॉलर किमतीच्या व्यापारी मालाच्या निर्यातीच्या आत्तापर्यंतच्या विक्रमात योगदान दिले. मेटॅलॉजिक पीएमएसद्वारे आयोजित पोलाद आणि अभियांत्रिकी निर्यात या विषयावरील परिषदेत पोलाद राज्यमंत्री कुलस्ते म्हणाले की, कोविड-19 मुळे उद्भवलेल्या आव्हानांना न जुमानता, आंतरराष्ट्रीय व्यापार तसेच देशांतर्गत पोलाद उत्पादन आणि वापर या दोन्ही बाबतीत पोलाद क्षेत्राच्या विक्रमी कामगिरीची नोंद घेणे औत्सुक्याचे आहे.
भारताचा सुमारे 106 दशलक्ष टन पोलादाचा आत्तापर्यंतचा उच्च वापर आणि 120 दशलक्ष टन उत्पादन हे केवळ या क्षेत्राची लवचिकता दर्शवत नाही तर भारतातील पोलाद उद्योजकांचे अनुकरणीय धैर्य आणि दृढनिश्चय देखील दर्शवतात, असे राज्यमंत्री म्हणाले.
पोलाद उत्पादकांनी अर्ध-तयार पोलादाऐवजी मूल्यवर्धित उत्पादनांच्या निर्यातीवर भर देण्याची सावधगिरी बाळगावी कारण देशातील पोलाद उत्पादन आणि निर्यात याचा थेट परिणाम देशाच्या अर्थव्यवस्थेच्या वाढीवर तसेच रोजगारावर होतो असे पोलाद राज्यमंत्र्यांनी सांगितले.
