पुणे-पाषाण-पंचवटी ते कोथरुडला जोडणार्या प्रस्तावित बोगद्याच्या कामासाठी पूर्व-व्यवहार्यता अभ्यास (प्री-फीजिबिलिटी स्टडी) आणि पर्यावरणीय परिणाम मूल्यांकन (एन्हायर्नमेंटल इम्पॅक्ट असेसमेंट) अहवाल तयार करण्यासाठी मोनार्च सर्व्हेअर अण्ड इंजिनिअरिंग कन्सलटंट प्रायव्हेट लिमिटेड या कंपनीची तज्ज्ञ सल्लागार म्हणून नियुक्ती करण्यासाठी आणि सल्लागार शुल्कापोटी ७२ लाख ७० हजार रुपये देण्यासाठी स्थायी समितीने मान्यता दिल्याची माहिती अध्यक्ष हेमंत रासने यांनी आज पत्रकार परिषदेत दिली.रासने म्हणाले, ‘कोथरुडमधील सुतारदरा ते पाषाण पंचवटी दरम्यान बोगदा तयार करून त्यातून रस्ता काढण्याचे महापालिकेचे नियोजन आहे. या बोगद्याचा समावेश शहराच्या विकास आराखड्यात करण्यात आलेला आहे. कोथरुड, औंध, बाणेर, पाषाण परिसरातील वाहतुकीची कोंडी सोडविण्यासाठी हा प्रकल्प उपयुक्त ठरणार आहे. या प्रकल्पासाठी सुमारे २५० कोटी रुपये खर्च होणे अपेक्षित आहे.’रासने पुढे म्हणाले, ‘पाषाण-पंचवटी ते कोथरुड दरम्यानच्या प्रस्तावित बोगद्यासाठी संरक्षण संशोधन आणि विकास संस्थे’च्या (डीआरडीओ) हद्दीमध्ये ड्रोनद्वारे सर्वेक्षणाची प्रक्रिया पूर्ण झाली आहे. महापालिकेची या संपूर्ण मार्गाच्या आखणीसाठी तयारी सुरू आहे. प्रस्तावित बोगद्याचा मार्ग निश्चित झाल्यानंतर संरक्षण आणि वन विभागाच्या जागांसाठीचा प्रस्ताव पाठविण्यात येणार आहे. स्थायी समितीने आज पूर्व-व्यवहार्यता अभ्यास आणि पर्यावरणीय परिणाम मूल्यांकन अहवाल तयार करण्यासाठी सल्लागार नियुक्तीस मान्यता देण्यात आली.’
महापालिका सेवकांच्या घरभाड्यात वाढ नाही
महापालिकेतील सेवक आणि सुरक्षा रक्षकांना मालमत्ता व्यवस्थापन विभागाकडून भाडेतत्त्वावर देण्यात आलेल्या सदनिकांची भाडेवाढ न करण्याचा निर्णय स्थायी समितीने घेतल्याची माहिती रासने यांनी दिली.रासने म्हणाले, ‘महापालिका कर्मचार्यांच्या वेतनातून दरमहा घरभाड्याची कपात करण्यात येते. सातवा वेतन आयोग लागू झाल्यानंतर या कपातीत दुप्पट वाढ होणार होती. परंतु या सदनिकांची दुरावस्था झाली असल्यामुळे प्रस्तावित वाढ अन्यायकारक ठरणार आहे. त्यामुळे महापालिकेच्या इमारतींमध्ये भाडेपट्टयाने राहात असलेल्या सर्व सेवकांची सहाव्या वेतन आयोगाप्रमाणेच घरभाड्यात कपात करण्याचा निर्णय घेण्यात आला.’
बाणेर पीएमपीएमएल बस चार्जिंग स्टेशनमध्ये एक कोटी पंचवीस लाख रुपयांची विद्युतविषयक विकासकामे
बाणेर येथील पुणे महानगर परिवहन महामंडळाच्या (पीएमपीएमएल) बस चार्जिंग स्टेशनमध्ये सुमारे एक कोटी पंचवीस लाख रुपयांची विद्युतविषयक विकासकामे करण्यास स्थायी समितीने मान्यता दिली. ‘पीएमपीएमएल बस चार्जिंग स्टेशनला वीज पुरवठा करणे आणि विद्युत विषयक कामांसाठी आवश्यक असणार्या निधीची तरतूद करण्यात आली आहे. यासाठी आठ निविदा प्राप्त झाल्या होत्या. त्यापैकी सर्वात कमी दर असणार्या निविदेला मान्यता देण्यात आली.’
बाळासाहेब ठाकरे नाट्यगृहात विद्युतविषयक कामे
‘कोथरुड येथे शिवसेना प्रमुख बाळासाहेब ठाकरे यांच्या नावाने नव्याने नाट्यगृहाची इमारत बांधण्यात आली आहे. या इमारतील विद्युत विषयक कामे करण्यासाठी सुमारे ७५ लाख ८५ हजार रुपयांच्या निविदेला मंजुरी देण्यात आली. इन डोअर फीटिंग, पंखे, वॉटर कुलर, पॉइंट वायरिंग, केबल टाकून विद्युत व्यवस्था, पी. ए. सिस्टिम बसविणे अशाप्रकारची कामे करण्यात येणार आहेत.
